اسلام آباد۔ 20 اکتوبر (اے پی پی) اسلامی کمکار تنظیم (او آئی سی ) نا وزرا اطلاعات کانفرنس نا 12 می دیوان 21 و 22 اکتوبر آ ترکی نا شار استنبول اٹی مریک۔ بنجائی وزیر حوالکاری مریم اورنگزیب کانفرنس اٹی پاکستان نا نمائندگی ءِ کیک۔ اِرادے ئی کانفرنس نا سرحال “سچائی نا دورآن پد غلط معلومداری و اسلاموفوبیا تون مون تننگ ” ءِ ۔ کانفرنس نا بنائی سیشن آن او آئی سی نا سیکرٹری جنرل حسن ابراہیم طحہٰ تران کیک۔ کانفرنس اٹی حوالکاری نا چندی بشخ آتیٹی اوآئی سی نا کڑد آ چکار کننگک۔ او آئی سی نا وزرا اطلاعات کانفرنس اٹی خاص وڑاٹ فلسطین و القدس شریف نا ویل آتا بابت میڈیا ءِ متحرک کننگ تون اوار افریقی او آئی سی باسک ملک آتا ویل آتے تالان کننگک۔ او آئی سی وزرا اطلاعات کانفرنس اٹی اسلاموفوبیا تون مون تننگ اٹ او آئی سی نا کڑد، اسلام نا سہی عکس ءِ پیش کننگ و میڈیا نا حلقہ غاتیٹی انتہاپسندی و دہشت گردی آن بچنگ نا بابت امور آ سجفنگک۔ کانفرنس اٹی مسلم دنیا ٹی میڈیا نا مہارت و تربیت نا مون آ دننگ نا بابت امور آ ہم گپ وتران مریک۔
