اقوام متحدہ۔ 20 اکتوبر (اے پی پی) پاکستان جی۔77 و چین آ تالان پدتموک ملک آتا 134 باسکی ٹولی نا چیئرمین نا حیثیت اٹ اقوام متحدہ غا زور شاغانے کہ او تینا چکار ءِ چاگڑدی بدلی تیا کے ہرا غٹ ملک آتے بھاز بے وڑ زہمی کننگ اٹی ءِ۔ اقوام متحدہ ٹی پاکستان نا آخبتی مندوب منیر اکرم پدتموک ملک آتا ٹولی نا نمائندگی ءِ کرسا سیاسی ونوآبادی تا آجوئی نا بابت امور نا بارواٹی جنرل اسمبلی نا فورتھ کمیٹی ہرا جنرل اسمبلی نا (فورتھ) کمیٹی آن تران کرسا پارے کہ پاکستان و وینزویلا ٹی ساڑی آ نوکاپ آن مروک آ بھسکاری چاگڑدی بدلی تا منفی اثرآتا تازہ انگا درور ءِ۔ او اقوام متحدہ غان خواست کرے کہ او چاگڑدی بدلی تیٹی ودی مروک آ ویل آتا ایسری آ چکار کے۔ پاکستانی مندوب پارے کہ نن مچ آ دنیا نا کمیونیکیشن ڈیپارٹمنٹ آتیان خواست کینہ کہ او دا وخت آ دنیا ءِ مون تروک چیلنج بشمول کورونا دین انا جہانی دین، چاگڑدی بدلی، جوہری سلہہ غاتا تالانی و برجا جنگ آتیا سٹریٹجک ردعمل نا درشانی ءِ کیر۔ اوداہیت آ ہم زور شاغا کہ دا چیلنج آتون مون تروک آ ملک آک، مواصلاتی و حوالکاری نا ادارہ و اقوام متحدہ نا تعلقدار ادارہ غاتا کاریم اٹی ہم گرنچی ودی کننگے تانکہ دابابت زیات آن زیات ٓگاہی تننگ مرے خاص وڑاٹ زہمی علاقہ غاتیٹی کمکی سرجزآتیٹی سٹریٹجک ہم گرنچی ودی کننگ مرے۔ او درست، پت انا قابل و بے کنڈ ہلوک معلومداری تا فراوانی نا اہمیت آ زور شاغا و بریکنگ نیوز اسٹوری و نیوز الرٹ آتیا سلاہ تننگ آن پاناد کرے۔ اوپارے کہ محکمہ ءِ خارتس تقریر آتا بیانیہ تون مون تننگ و رواداری، بے پرخی، تکثیریت و آجوئی سلاہ و درشانی ءِ سلاہ ءِ مون آ دننگ کن پوسکن آ و روایتی میڈیا تون شریداری کننگ و اودے پین سوگو کننگے۔پاکستانی مندوب منیر اکرم آن لائن پلیٹ فارم تیا دروغ انا خبر و غلط معلومداری تا تالانی ٹی ودکی نا حوالہ ءِ ترسا محکمہ غا زور شاغا کہ او غلط و گمراہ کن معلومداری تا توننگ و رواداری، تین پہ تینی پرامنی و بین المذاہب و دودوربیدگی ہم گرنچی نا کلہو آتے مون آ دننگ کن اقوام متحدہ نا کوشست آتا سوگو مخ تفی ءِ کیر۔ اوجی 77 نا کنڈآن صحافی و میڈیا ورکرآتا برخلاف بیدادی آ گڑتی نا درشانی ءِ کرے و اوفتا برخلاف مروک آ ڈوہ انا احتساب ءِ پک کننگ نا گرج آ زور شاغا۔ اوپارے کہ نن فلسطینی امریکی صحافی شیرین ابو عاقلہ نا خون نا ترندی اٹ مذمت ءِ کینہ و دا چرجوئی ٹی احتساب نا عمل ءِ پک کننگ نا گرج ءِ۔ اوڈیجیٹل پرخ انا بابت پارے کہ تعلقدار ادارہ غاتے زیات آن زیات انٹرنیٹ کنیکٹیویٹی ءِ رکھ کننگ خاص وڑاٹ پدتموک ملک آتیٹی انفارمیشن و کمیونیکیشن ٹیکنالوجی نا شونداری ٹی ساڑی آ عدم توازن ءِ مر کننگ کن گام گیج کروئی مریک۔ پاکستانی مندوب منیر اکرم کثیر اللسان ءِ مرکزی دنگ اٹ اتنگ نا اہمیت آ زور شاغا و محکمہ غان خواست کرے کہ او کثیر لسانی ءِ مون آ دننگ و داوڑ شیفکو کہول آ زیات آن زیات رسینگ کن پوسکن آ مالیاتی واکداری تا پٹنگ تون اوار اوار رضاکارانہ شریداری تون اوار جوان وسیلہ غاتے متحرک کے۔ اومحکمہ غا زور شاغا کہ او مچ آ دنیا ٹی اقوام متحدہ نا اطلاعاتی ہند آتے سوگو کننگ نا مخ تفی ءِ برجاتخے۔
