اسلام آباد۔ 20 اکتوبر (اے پی پی) وزارت ریلوائی نا کنڈآن قومی اسمبلی ءِ پاننگانے کہ ملک انا ہر چار آ صوبہ غاتیٹی ریلوائی نا 9986 ایکڑڈغار آ کوزہ ءِ، تدوک آ پنچ سال اٹی 952 ایکڑ ڈغار ءِ واگزار کرفنگانے، ایلو ڈغار تیا کوزہ غاتے واگزار کرفنگ کن کارروائی برجاءِ۔ پنچ شنبے نادے آ قومی اسمبلی ٹی وقفہ سوج آتیٹی طاہرہ اورنگزیب نا سوج انا ورندی ٹی وزارت ریلوائی نا کنڈآن نوشتہی ورندی ٹی پاننگاکہ ریلوائی نا مچ آ ملک اٹی 9986 ایکڑ ڈغار تیا مخلوق کوزہ کرینے ہرافتے ٹی پنجاب اٹی 3287ایکڑ، خیبرپختونخوا ٹی 832 ایکڑ، سندھ اٹی 5180 ایکڑ و بلوچستان اٹی 687 ایکڑ ڈغار اوار ءُ۔ سپریم کورٹ نا پرمان ءِمون آ تخسا مچ آ ریلوائی نیٹ ورک اٹی ریلوائی نا کوزہ ٹی ڈغار تے واگزار کرفنگ کن تجاوزات آتا برخلاف آپریشن نا بناءِ کننگا و کوزہ گیر آتیان ریلوائی نا ڈغار تے واگزار کرفنگ کن غٹ ڈویژنل سپرنٹنڈنٹ آتے کارروائی نا پرمان کننگا۔ انسداد تجاوزات آتا سہ ماہی شیڈول اسیجائی کارروائی نا پرمان نا رداٹ تیار کننگک و غٹ تعلقدارآتے ارسال کننگک۔ تدوک آ پنچ سال اٹی تجاوزات آتا برخلاف چندی آپریشن تیٹی 9603 ملین روپئی آن زیات مالیت نا 952.13ایکڑ ریلوائی ڈغار تے واگزار کرفنگانے۔ طاہرہ اورنگزیب نا ضمنی سوج انا ورندی ٹی پارلیمانی سیکرٹری کرن عمران ڈار پارے کہ تدوک آ پنچ سال اٹی کم ڈغار واگزار کرفنگا ولے دااسہ برجاعمل اسے، ریلوائی ایلو محکمہ و انتظامیہ تون اواری اٹ ایلو ڈغار تے ہم واگزار کرفک۔
