پیشن نا ملک رہینگوک آ پاکستانی تا درمان کن ہچ ءُ ہسپتال اس جوڑ کننگتنے، وزارت جان جوڑی نا قومی اسمبلی ٹی نوشتہی ورندی

اسلام آباد۔ 20 اکتوبر (اے پی پی) وزارت جان جوڑی و قومی خذمت نا کنڈآن قومی اسمبلی ءِ پاننگانے کہ پیشن نا ملک رہینگوک آ پاکستانی تیکن درمان نا فراوانی کن ہچ ءُ ہسپتال اس جوڑ کننگتنے ولے اوفتے درمان نا فراوانی کن سلاہ تیا سجفنگک۔ پنچ شنبے نادے آ قومی اسمبلی ٹی وقفہ سوج آتیٹی طاہرہ اورنگزیب نا پیشن نا ملک پاکستانی ہسپتال آتا سرجم و پین ہسپتال جوڑ کننگ نا بابت سوج انا ورندی ٹی  وزارت قومی جان جوڑی و خذمت نا کنڈآن نوشتہی ورندی ٹی پاننگاکہ وزارت قومی جان جوڑی و خذمت پاکستانی تیکن پیشن نا ملک ہچ ءُ ہسپتال اس جوڑ کتنے و پیشن نا ملک ہسپتال جوڑ کننگ نا ہچ ءُ ڈٹ اس اف۔ طاہرہ اورنگزیب نا ضمنی سوج انا ورندی ٹی پارلیمانی سیکرٹری ڈاکٹر شازیہ ثوبیہ پارے کہ منہ وخت اکن ہر اپاکستانی ملک آن پیشن کاہک اوفتے کن جتا ءُ ہسپتال اف۔ وزیٹر پاکستانی تیکن جان جوڑی نا آسراتی تا فراوانی نا سلاہ جوان ءِ اوڑا سجفنگک۔