اسلام آباد۔19اکتوبر (اے پی پی): مزن وزیر محمد شہباز شریف ءَ چینی ڈیزاسٹر مینجمنٹ ءِ زانت کارانی حاسیں ڈل ءِ ہار ءِ آماچیں د مگانی ترء ُ تاب ءِ سرءَ وشی ءِ درشانی کتگء ُ اے اُمیت ءِ درشانی کتگ کہ قدرتی آپت ءِ وہدءَ ریسکیو ءُ ریلیف ءِہوالگءَ چینی زانت کارانی تجروبت پاکستان ءِ ھاترءَ بانداتءَ ہم پائدگ مند بیت۔ چارشمبے ءِ روچءَ مزن وزیر کارگس ءِ میڈیا ونگ ءِ نیمگ ءَ شنگ بوتگیں بیان ءِ ردءَ مزن وزیر محمد شہباز شریف ءَ گوں اسلام آباد ءَ چینی ڈیزاسٹر مینجمنٹ ءِ زانت کارانی حاسیں ڈل ءَ چین ءِ ڈیپارٹمنٹ آف فلڈ کنٹرول، ایمرجنسی منیجمنٹ وزارت ءِ ایمرجنسی کمانڈنگ آفیسر ژوژیان بیاؤ ءِ سروکی ءَ گندء ُنند کتگ کہ آئی ءِ تہا بنجاہی وزیر احسن اقبال، شیری رحمن ، حاسیں کمک کار ظفر الدین محمود، چیئرمین این ڈی ایم اے ء ُ چیئرمین این ایف آر سی سی ءَ ابید ہمگرنچیں حکام ہوار بوتگ۔ مزن وزیر ءَ گشتگ کہ آ چینی ڈل ءَ را سوج دنت کہ ملک واتری ءَ چہ پیسر پاکستانی حکومت ء ِ گوما ڈیزاسٹر مینجمنٹ ءِ تہا کمک ءِ من ء ُ گرءِ سرءَ دستخط بہ کنت ء ُ واتر بہ بیت۔ مزن وزیر ءَ گشتگ کہ چین ءَ پاکستان ءِ ہرچ گرانیں ساہت ءَ کمک کتگ، اے پاکستان ء ُ چین ءِ دیریگیں سیاد ی ءِ یک جوانیں درور اِت۔ آ ئی ءَ گشتگ کہ سندھ ء ُ بلوچستان ءِ بازیں دمگ تاں انگت آپ ءِ تہا اَنت ءُ اوشتاتگیں آپ ءَچہ بازیں نادراہی ودی بوہگءَ اَنت۔ آئی ءَ پاکستان ء ُ چین ءَ کارکنوکیں چینی کمپنی آنی نیمگ ءَچہ مزن وزیر فلڈ ریلیف فنڈ ءِ تہا کمک کنگءَ آیانی شکرء ُمنت گپتگ۔ ڈل پاکستان ء ُ چین ءِ نیام ءَ ہارءِ پیشن گوئی ء ُ آئی ءِ اثرآناں کم کنگءِ ھاترءَ انفراسٹرکچر ءِ جوڑ کنگ ءَ پاکستان ءَ را کسانیں، درنیامی ء ُ دراج مدتی منصوبگانی سرءَ تکنیکی کمک کنت۔ چینی ڈل ءَ ہمگرنچیں پاکستانی ادارگ ء ُحکام ءَ گوں کمک کنگءِ ھاترءَ ورکنگ گروپ جوڑ کتگ ء ُ 21 اکتوبر ءَ را این ڈی ایم اے ءَ را آماچیں دمگاں مردم ءُ انفراسٹرکچر ءِ بحالی کنگءِ ھاترءَ سرجمیں پلان ء ُ رپورٹ ءَ پیش کنت۔
