اسلام آباد۔ 21مئی ( اے پی پی ) ھال ءُ اھیوال کاری ءُ شنگکاری ئِ بنجاھی وزیر ءُ سینیٹر پرویز رشید ئَ گشتگ کہ چین سیادی وت مہ وت ئَ اوست ءُ امن ءُ ایمنی ءُ دیم روئی ئِ یک وڑیں کوشستانی سرئَ اِنت ، انوگیں حکومت اے سیاد ی ئَ را گیش مھکم کنگ ئِ ھاترئَ دراھیں گامگیجاں کنت، پاک چین اقتصادی راہداری خطہ ءُ میاں اوستمانی سیاست ئِ تہا پاکستان ئِ ارزشت ئَ را گیش کنت، انفراسٹرکچر ئِ دیم روئی دوھیں ملک آنی درنیام ئَ اقتصادی ءُ باپاری دیم روئی ئِ تہا مزنیں ارزشتے داریت ، دوھیں ملک آنی درنیام ئَ سفارتی سیادی ئِ جوڑ کنگ ئَ تاں بہ گر تاں انوں جوانیں سوبمندی حاصل کتگ ءُنوں مے بے مٹیں دوستی سٹریٹجک شریداری ئِ تہا مٹ بوتگ۔ آ شمبے ئِ روچئَ لوک ورثہ ئَ پاکستان ءُ چینئِ سفارتی سیادی ئِ 65می ودی روچ ئِ موھئَ دو روچی چینی نماش ئِ بنگجی مراگش ئَ گوں تران کنگ ئَ بوتگ۔ اے موھ ئَ چینی سفیر سن وی ڈونگ، آئیءِ لوگ بانک باﺅ ژی چنگ ءُ ایگزیکٹو ڈائریکٹر ڈاکٹر فوزیہ سعید ھم ساڑی بوتگ ۔آئیئَ اے گپ دوھیں ملک آنی سیادی وت مہ وت ئَ یک وڑیں ھیال ءُ لیکہ ، اوست ءُ امن ئُ ایمنی ءُ دیم روئی ئِ یک وڑیں کوشستانی سرئَ جوڑ اِنت ،حکومت آنی مٹ ءُ بدلی ئَ ابید ھم دوھیں ملک آنی سیادی دائمئَ وش ءُ وشھال بوتگ کہءُ ھمک چکاس ءَ سوبمند بوتگ۔ سینیٹر پرویز رشید ئَ گشتگ کہ چین ءُ پاکستان ئَ سیاسی، فوجی، سفارتی ءُ دود ءُ ربیدگی پڑ ئَ ھوار سائنس ئُ ٹیکنالوجی ئَ مزنیں کساسے ئَ کمک کتگ ،دوھیں ملک آنی درنیامئَ سفارتی سیاد ی ئِ جوڑ کنگ ئَ بہ گر تاں انوں جوانیں سوبمندی حاصل کتگ ءُ نوں مے نمیرانیں سنگتی سٹریٹجک شریداری ئِ تہا مٹ بوتگ اَن۔ دوئیں ملکانی نیام ئَ کمنیوکیشن آنی تہ ئَ گیشی اتکگ۔ آئی ئَ گوشت اے وھد ئَ کہ میاں اوستمانی ئُُ دمگی جاور گوں تُرندی ئَ مٹ بوھگ ئَ اَنت۔ ما جوانیں سٹریٹیجک پارٹنر شپ آناں گیش ودینتگ۔ آئی ئَ گوشت کہ انفراسٹرکچر منسوبگانی یکجائی ئَ دیمروئی ئَ چہ پاک چین تعلکداری گیش بوھان اَنت۔ اے منصوبگاں چہ دوئیں ملکانی ٹرانسپورٹ ئِ ھرچ ئُُ درچ ئِ سر ئَ مزنیں کچ ئَ باست ئُُ واست بیت ۔ انفراسٹرکچر ئِ دیم روئی دوھیں ملک آنی درنیام ئَ اقتصادی ءُ باپاری دیم روئی سکیں مزنیں ارزشتے داریت۔ ھال ءُ اھیوال کاری ءُ شنگکاری ئَ گشتگ کہ شاہراہ ریشم ئِ 2000سالہ کوّن منصوبہ ئِ سرئَ نظر گور کنگ ئِ انوگیں گامگیجاں چہ پاکستانئَ ھوار بازیں ملک آنی درنیام ئَ نزیکی ءُ کمک گیش بیت۔ آئی ئَ گشتگ کہ پاک چین اقتصادی راہداری نہ تنا یک دگّ اِت بلکیں باپاری، سیاسی، سٹریٹجک زرکاری اِت کہ خطہ ئِ تہا میاں اوستمانی سیاست ئِ تہا پاکستان ئِ ارزشت ئِ تہا گیشی کنت۔ ھال ءُ اھیوال کاری ئَ گشتگ کہ سی پیک شاہراہ ریشم ئِ گوما تعمیر کنگ بوھگ ئَ اِنت کہ ایشیئِ تہا مھکمیں اقتصادی بنیات داتگ ءُ پاک چین سیادی ئَ را گیش پراھ ءُ شاھگان کنگ بوتگ۔ اے سیادی ئَ ر ا نوں کارپوریٹ ءُ سفارتی سٹریٹجک شریداری لیکگ بوتگ۔ آئی ءَ گشتگ کہ پاکستان ئُ چین ئَ مارچ 1965ئَ دودءُ ربیدگی من ءُ گر ئِ سرئَ دستخط کتگ ، 2014ءَ چین ئِ سینٹرل ٹیلی ویژن ءُ پاکستان ٹیلی ویژن کارپوریش لمیٹڈ ئَ براڈ کاسٹنگ ئِ پڑ ئَ وت مہ وت ئِ کمک ئِ یک یات گیری ئِ سرئَ دستخط کتگ بوتگ۔ بنجاھی وزیر ئَ گشتگ کہ دوھیں ملک آنی ھال درءُ براڈ کاسٹنگ ئِ درنیا مئَ کمک ءُ میڈیا پرسنز ئِ تبادلہ کنگئَ روچ پہ روچ گیشی بوھگ ئَ اِنت۔ آئیئَ گشتگ کہ منئَ اے گپ ئِ سرئَ پھک باور اِنت کہ دوھیں ملک آنی اُلسئِ درنیام ئَ گہتریں ھم ھیالی ترندءُ مھکمیں سیادی ئِ ضمانت اِنت آئیئَ گشتگ کہ مزن وزیر محمد نواز شریف ئِ حکومت چینی اُلس ءُ حکومت ئِ گوما سیادی ئَ را گیش مھکم جوڑ کنگ ءِ ھاترئَ دراھیں گامگیجاں کنگئَ اِنت۔ سینیٹر پرویز رشید ئَ پاکستانی اُلس ءُ حکومت ئِ نیمگئَ چینی حکومت ءُ اُلس ئِ ھاترئَ نیکیں واھگانی درشانی کتگ۔ ایشی ئَ چہ پیسر سینیٹر پرویز رشید ئَ دو روچی نما ش ئِ بنگیجی مراگش ئَ ھوار بوھگئَ چینی سفیر ئُ آئیئِ لوگ بانک ئِ شکرءُ منت گپتگ۔ اے موھئِ سرئَ چینی سفیر سن وی ڈونگ ئَ گشتگ کہ مرچیگیں روچ پاک چین دوستی ئِ ھاترئَ سکیں ھاسیں روچ اِت چیاکہ مرچیئَ چہ 65سال پیش دوھیں ملک آنی درنیام ئَ سفارتی سیادی ئِ بندات بوتگ۔ آئیئَ گشتگ کہ پاک چین اقتصادی راہداری نہ تنا دوھیں ملک آں پاھدگ رسیت بلکیں سرجمیں خطہ ئَ را پاھدگ دنت۔ آئیئَ گشتگ کہ چینی نماش ئِ بُنگیج ئِ مول ءُ مراد پاکستان ئِ مردماناں چینی دود ءُ ربیدگ ئَ چہ پجّار کنگی اِنت۔ مراگش ئَ چہ پد ھال ءُ اھیوال کاری ءُ شنگکاری سینیٹر پرویز رشید ءُ چینی سفیر ئَ نماشئَ جتگیں سٹال آنی ترءُ تاب کتگ ۔
