نیویارک۔ 21 ستمبر (اے پی پی) وزیرخارجہ بلاول بھٹو زرداری نیویارک اٹی پاکستان نا آخبتی مشن اٹی ورنا وزیر خارجہ غاتا دیوان نا مہمانداری ءِ کرے۔ کینیڈا، جمہوریہ چیک ، ہنگری، آئس لینڈ، لیتھوانیا، لیکٹن سٹائن ، پاناما، قطر و سربیا نا وزیر خارجہ غاک دیوان اٹی بشخ ہلکر۔ ترجمان دفترخارجہ نا رداٹ وزیرخارجہ انسانیت ءِ مون تروک ساڑی و آخبت نا چیلنج آتے مون آ تخا۔ اوغٹ اکن سلامتی، امن و ہم گرنچی نا ضمانت تخوک آخبت نا جہانی نظام نا ٹہیفنگ کن شش ٹکی ایجنڈا نا خاکہ ءِ پیش کرے۔ داموسمیاتی بدلی، تکنیکی و سائنسی شونداری، چاگڑد دوست ملازمت، پوسکن آ سپلائی چینز ، تنکی و ہلہلہ ئی حالیت آتیان زہمی جہانی زرگزران، پرامن بقائے تین پہ تینی و جھیڑہ غاتا ایسری، تزویراتی مسابقت، آخبت اٹی ممکنہ دینی مرض و سوگو کثیر جہتی کمکاری نا گرج کون آ چیلنج آتا احاطہ کیک۔ اقوام متحدہ نا سیکرٹری جنرل نا خصوصی ایلچی برائے نوجوانان ئسک ہم دیوان اٹی بشخ ہلکر و ورناتا تینا آخبت نا جوڑ کننگ نا عمل اٹی پبی بشخ ہلنگ نا بابت سیکرٹری جنرل نا خیال آتے تالان کرے۔ شریک وزیرخارجہ غاک امنائی و پرزور وڑاٹ وزیرخارجہ نا گام انا ستاءِ کریر و داویل آتا خاکہ اس پیش کریر ہرافتے او دنیا نا قوم تاآخبت کن اہم تکرہ۔ اوفک ساڑی چیلنج، بشمول سیاسی، سیکورٹی، اقتصادی، انسانی حق و چاگڑدو تین پہ تینی پت اٹی کمتی ، انسانی رابطہ، ورناتے مون تروک ویل و جہانی کمکاری ٹی کمتی نا ذکر ءِ کریر ۔ بشخ ہلوک آتیٹی ایہن امنائی ئسک کہ دا پوسکن آ پلیٹ فارم اسہ شاندار ءُ گام اسے ہرانا بایدے خیرمقدم ءِ کننگے۔ وزیرخارجہ ایسر اٹ میٹنگ اٹی پاش کروک آ نہادی خیال آتے نوشتہ کرے ہرا اقوام متحدہ نا سیکرٹری جنرل نا کنڈآن سلاہ کروک “آخبت نا معاہدہ” نا جوڑ کننگ اٹ سجفنگ کن معلومداری فراوان کیرہ۔ شرہ نا خلاصہ ءِ غٹ بشخ ہلوک آ وزیرآتے گدریفنگک و اوکان پد اقوام متحدہ نا باسک ملک و ایلو اسٹیک ہولڈر آتون شیئر کننگک۔
