اسلام آباد۔ 20 ستمبر (اے پی پی) چیئرمین سینیٹ محمد صادق سنجرانی پارینے کہ پاکستان اٹی جان جوڑی، ریئل اسٹیٹ، توانائی و کشت وکشار نا بشخ آتیٹی زرکاری نا گچین وارخواہی ساڑی ءِ، کمبوڈیا ناپوریاگرآک پاکستان اٹی زرکاری نا وارخوہای تیان فائدہ ہرفر، پاکستان اٹی ساڑی آ پِر و نوکاپ اٹی بروک آمشکل آتیٹی اختہ الس نا بحالی کن اجتماعی کوشست آتے ترند کننگ نا گرج ءِ۔ داخیال آتا درشانی ءِ و سلطنت کمبوڈیا نا ورلڈ بریج گروپ آف کمپنیز نا چیئرمین و بورڈ آف ڈائریکٹرز آ تالان ڈل اتون گپ وتران کرسا کرے ہرا سے شنبے نادے آپارلیمنٹ ہاؤس اٹی اوڑتون اوڑدہی کریر۔ چیئرمین سینیٹ ڈل ءِ بخیر اٹ پارے۔ اوڑدہی ٹی پاک۔ کمبوڈیا نا ہڑتوم آ کنڈآتا تعلقداری، واپار وزرکاری تون اوار تین پہ تینی است خواہی نا امور آ گپ وتران کننگا۔ چیئرمین سینیٹ پارے کہ اومیت ءِ کمبوڈیا نا ڈل انا دادورہ غان ہڑتوم آ ملک آتا نیام اٹ واپاری تعلقداری پین سوگو مریک، پاکستان وکمبوڈیا نا نیام اٹ واپاری کچ 30 ملین ڈالر ءِ ولے ہڑتوم آ ملک آتا کاریم نا کچ ءِ ہرسا اودے پین ودفنگ مریک۔ اوپارے کہ ورلڈ بریج گروپ چندی بشخ آتیٹی زرکاری نا گچین وارخواہی فراوان کیک ہراڑآن پاکستانی زرکارآک ہم فائدہ ہرفر۔ چیئرمین سینیٹ چیئرمین ورلڈ بریج گروپ نیک اوکھا سیر ریتھی تون گپ وتران کرسا پارے کہ ایس ایم ای و ایف ڈی آئی نا نیام اٹ پرخ ءِ چٹفنگ نا بابت اونا ایس ایم ای کلسٹرنگ نا وژن انقلابی ءِ، کمبوڈیا غانبار پاکستان اٹی ہم زرگزران ءِ گچین کننگ اٹ ایس ایم ای نا اہم ءُ بشخ اسے۔
