اسلام آباد۔ 20 ستمبر (اے پی پی) صدر مملکت ڈاکٹر عارف علوی پاکستان و ترکی نا نیام اٹ واپار اٹی ودکی آ چکار کرسا برادرانہ تعلقداری تے پین سوگو کننگ نا گرج آ زور شاغانے۔ اوداہیت ءِ ترکیہ ٹی پاکستان نا پندار سفیر ڈاکٹر یوسف جنید تون گپ وتران کرسا پارے ہرا سے شنبے نادے آ داڑے ایوان صدر اٹی اوڑتون اوڑدہی کرے۔ صدر مملکت پندار سفیر ءِ اونا تقرری آ مبارکبادی تس و پارے کہ پاکستان ترکی تون ہڑتوم آ کنڈآتا واپار و زرکاری نا تعلقداری تے مون آ دننگ کن سنبرینگوک ءِ۔ اوپارے کہ گڑاتا واپار نا معاہدہ غا دستخط آن نیامی مد اٹی 5 بلین ڈالر نا ہڑتوم آ کنڈآتا واپاری ہدف ءِ دوئی کننگ نا کسر آوار مریک۔ اومچ آ دنیا و خاص وڑاٹ ہندوستان اتی ہراڑے مسلمان تے ہڑدے ئی بنداو آ زیزاریفنگ انگ ءِ، اسلاموفوبیا نا مقابلہءِ کننگ کن پاکستان نا کوشست آتیکن ترکہ نا مخ تفی نا اعتراف ءِ کرے۔ اوبھارت نا غیر کانودی کوزہ گیری ٹی جموں وکشمیر نا جھیڑہ غا ترکیہ نا کنڈآن پاکستان نا مخ تفی آ ہم منت واری ءِ درشانی ءِ کرے و پندار سفیر ءِ پارے کہ او ترکیہ ءِ داجوزہ غاتیان معلومدار کے۔ صدر مملکت پندار سفیر ءِ باور کرفے کہ پاکستان ترکیہ نا بنداوی ایشوز آ اونا مخ تفی کن سنبرینگوک ءِ۔ پاکستان نا ترکیہ نا تعلقداری تا جوڑ مننگ آن پد آن ہڑتوم آ ملک آتا نیام اٹ جم وڑاٹ 190 آن زیات معاہدہ/ایم او یوتیا دستخط کننگانے۔
