اسلام آباد۔ 20 ستمبر (اے پی پی) وزیراعظم نا سلاہکار انجینئر امیر مقام پارینے کہ ساڑی حکومت نوکاپ زہمی تا بحالی کن اولیتی بنداو تیا گام گیج کننگ اٹی ءِ، سوات اٹی 2010 نا نوکاپ آن ہم زیات نسخان مسنے، مصیبت نا ساہت اٹی جہانی ادارہ و آسودہی تنظیمک پبی کمک کریر۔ داخیال آتا درشانی ءِ او سے شنبے نادے آ سوات اٹی گریڈ اسٹیشن نا بنانا وخت آ گپ وتران کرسا کرے۔ اوپارے کہ واپڈا نا کارندہ غاک ناممکن ٹارگٹ ءِ ممکن کریر، مصیبت نا ساہت اٹی جہانی ادارہ و آسودہی تنظیمک نوکاپ نا دے تیٹی بھاز جوان کاریم کریر۔ ای ہمو غٹ ادارہ غاتے خراج تحسین پیش کیوہ۔ اوپارے کہ سوات اٹی 2010 نا نوکاپ اٹی ہم بجلی نا تنصیب آتے نسخان رسینگا،ہمووخت آ ہم نن بجلی ءِ بحال کرفین، ساڑی آ نوکاپ اٹی ہم بجلی نا تنصیب و موبائل فون ٹاورآتے بھاز نسخان رسینگا۔ ای تعلقدار کمامدار آتون زہمی جاگہ غاتا دورہ ءِ کریٹ، انشاء اللہ بھاز زوت دُوارہ کاریم ءِ پورو کننگک۔ اوپارے کہ مہالو نوکاپ اسہ خاص ءُ علاقہ سے ٹی بسکہ ولے بدبختی اٹ داوار مچ آ ملک نوکاپ آن زہمی مسنے۔ اوپارے کہ ملک ءِ وزیراعظم محمد شہباز شریف نا حالیت اٹ داوڑنا جوزہ والو و باہمت لیڈر اس ملانے ہرا تینٹ زہمی علاقہ غاتیا ہِننگ ءِو بحالی نا کاریم تے تنیٹ مانیٹر کننگ اٹی ءِ، ای خاص وڑاٹ پاکستان فوج ءِ خراج تحسین پیش کیوہ ہرافک ہروارآنبار نوکاپ زہمی تا پبی کمک ءِ کریر۔
