اسلام آباد۔ 20 ستمبر (اے پی پی) چیئرمین سینیٹ محمد صادق سنجرانی سے شنبےنادے آ اسلام آباد اٹی جہانی ادارہ جان جوڑی (ڈبلیو ایچ او) نا دفتر نا دورہ ءِ کرے، سینیٹر نصیب اللہ بازئی ہم چیئرمین سینیٹ تون اوارئسک۔ ڈبلیو ایچ او نا پاکستان اٹی سروک ڈاکٹر پلیتھا گونر اتھنا ماہیپالا چیئرمین سینیٹ ءِ بخیر کرے۔ ڈاکٹر پلیتھا گونر اتھنا ماہیپالا بلوچستان نا نوکاپ آن زہمی ضلع غاتیکن المی میڈیکل گڑا ہرافتے ٹی ایمبولینس، بائیک، الٹراساؤنڈ و ایکسرہ مشین دوائی اوار ءُ چیئرمین سینیٹ نا دوٹی تننگا۔ ایمبولینس و بائیک خاص وڑاٹ بلوچستان نا ضلع چاغی کن فراوان کننگانے۔ چیئرمین سینیٹ المی امداد فراوان کننگ آ ڈبلیو ایچ او نا سروک نا منت واری ءِ ہرفے۔ ڈبلیو ایچ او نا پاکستان اٹی سروک ڈاکٹر پلیتھا گونر اتھنا ماہیپالا پارے کہ پاکستان ءِ داوخت آ قدرتی آفت مون تروک ءِ و جان جوڑی نا ہند، طبی ازباب آتون اوار ایلو گڑاتے فراوان کننگ اُن۔ زہمی علاقہ غاتیٹی ملیریا، ڈینگی و ڈائریا نا دین تالان مسنے و مخلوق ءِ غذائی کاختی ہم مون تروک ءِ۔ اوپارے کہ چناتیٹی غذائی کاختی نا چٹفنگ کن نن کاریم کننگ اُن دا مشکل وخت اٹی پاکستان ءِ ہرممکن امداد فراوان کننگ کن کوشست کننگ انگ ءِ۔ چیئرمین سینیٹ محمد صادق سنجرانی پارے کہ دامشکل وخت اٹی ڈبلیو ایچ او نا کنڈآن پاکستان نا پبی کمک آ سینیٹ وپاکستانی الس نا کنڈآن منت واری ءِ ہرفیوہ و نوکاپ نا بنائی بھسکاری تیان پد داسہ ہم اسہ مشکل ءُ ریسہ اس سلوک ءِ مخلوق ءِ ساف دیر و غذا فراوان کننگ آ چکار کروئی مریک۔ زہمی علاقہ غاتیٹی مخلوق ءِ دینی مرض آتیان بچفنگ کن ڈبلیو ایچ او نا کوشست ستاکڑزک۔ اوپارے کہ سروک ڈبلیو ایچ او نا درخواست آ جان جوڑی نا بابت کمیٹی اس جوڑ کننگانے و کمیٹی ڈبلیو ایچ او نامشورہ اٹ کاریم کیک و کووڈ آن ہلیس ساڑی آ نوکاپ اسکان مخلوق ءِ بنداوی جان جوڑی نا آسراتی فراوان کننگ اٹ اہم ءُ کڑد اس ادا کرینے۔ چیئرمین سینیٹ پارے کہ نوکاپ آن زہمی بلوچستان نامر مرانگا و پدسلوک علاقہ غاتسکان جان جوڑی نا بنداوی تا فراوانی کن ڈبلیو ایچ او گچین کڑد ادا کرینے۔ بلوچستان نا الس و حکومت نا کنڈآن ہم نما منت واری ءِ ہرفیوہ و نن ڈبلیو ایچ او تون اواری اٹ پاکستان نا ہیلتھ سیکٹر اٹی مثبت بدلی اس اتینہ۔
