ایشیائی شونداری بینک نوکاپ نا زہمی تیکن 30 لکھ ڈالر نا امداد نا منظوری ءِ تس

اسلام آباد۔ 20 ستمبر (اے پی پی) ایشیائی شونداری بینک حکومت پاکستان نا نوکاپ نا زہمی و زہمی علاقہ غاتا بحالی کن ہلہلہ ئی کمکی کاریم تیٹی کمک کن 30 لکھ ڈالر نا گرانٹ نا منظوری ءِ تسنے، دا گرانٹ کشارگر آتا فصل آتا نسخان تا پوروی، بنداوی پنجر نا دُوارہ پوسکن تفنگ و زہمی تا آبادکاری نا مد اٹی فراوان کننگک۔ سرجم حوال آتا رداٹ ایشیائی شونداری بینک انا کنڈآن پاکستان نا نوکاپ زہمی تیکن بھلو پیکج اسے نا منظوری ءِ تسنے، ایشیا پیسیفک ڈیزاسٹر ریسپانس فنڈ(APDRF) آن مالی کمک فراوان کروک آ دا گرانٹ مچ آ ملک اٹی نوکاپ زدگان تا امداد کن خور انا گڑا، تمبو و ایلو کمکی گڑاتا دمدستی ہلنگ کن فنڈ فراوان کننگک۔ اے ڈی بی اعلامیہ ٹی پاننگانے کہ مشکل وخت اٹی پاکستان نا پبی کمک ءِ کننگک۔ اے ڈی بی اعلامیہ نا رداٹ نوکاپ آن زہمی علاقہ غاتیٹی ریلیف کن 30 لکھ ڈالر نا فنڈ فراوان کننگک، زر آن نوکاپ اٹی نیزگار و حقدار بندغ آتون اوار ناجوڑ زالبول و چناتا کمک ءِ کینہ۔ فنڈ آن کشارگرآتا فصل آتا نسخان نا پوروی، دُوارہ فصل آتا دسنگ نا موقف فراوان کننگک و نوکاپ آن بھس سڑک، پول، تباہ حال اُرا، اسکول، ہسپتال و ایلو ماڑی تا پوسکن تفنگ اٹ کمک کینہ۔ اے ڈی بی نا ڈائریکٹر جنرل نیامی و دیکی ایشیا یوگینی زوکوف پارینے کہ اے ڈی بی مشکل نا داساہت اٹی پاکستانی الس تون تفوک ءِ۔