پشاور۔ 22 اگست (اے پی پی) جے یوآئی نا سروک مولانا فضل الرحمان پارینے کہ ننا اکابر فتنہ غاتا مقابلہ ءِ اُراتیٹی تولسا آخا بلکن میدان عمل اٹ کرے، جے یو آئی نیازی فتنہ غا خن تے تر کرسا تولپک۔ داخیال آتا درشانی ءِ جے یو آئی نا سروک مولانا فضل الرحمان پشاور اٹی مرکزی مجلس عمومی نا ایسری سیشن آن تران کرسا کرے۔ اوپارے کہ ننے پاننگاکہ خیبرپختونخوا ٹی مذہب نا ماس تے چٹفنگ کن نیازی ءِ حکومت تننگا۔ اوپارے کہ ننا جماعت قرآن کریم نا پرمان تے گوجالنگ کپک۔ پاکستان نا جم سیاست اٹ غٹ مسالک آتا عالم دینک متفق ءُ۔ ننا جمہوریت نا تعین ءِ ننا آئین کیک۔ اوپارے کہ مملکت نا حکمرانی الس نا تائید اٹ مرے ولے وڑوڈول حکمرانی قرآن و سنت ءِ مون آتخسا مرے۔ کانود جوڑ کننگ نا بابت حکومت نا بنداوی ہدف گچین کاری و نیب کانود اٹی اصلاحات ءِ۔ پیشن نا ملک ساڑی پاکستانی تے وونٹ بٹنگ نا شوشا اس اِلنگا داڑکن ہچ ءُ جوان ءُ وڑوڈول اس الوکہ و داٹی نود درسد دھاندلی نا گڑتی ئسک۔ اوپارے کہ ننا سلاہ ئس کہ پیشن نا ملک پاکستانی تے جوان نمائندگی تننگے۔ اوپارے کہ افسر شاہی شرعی امور ءِ سنجیدہ ہلے۔ دا اسہ اسلامی ءُ ملک اسے۔ اوپارے کہ نیب انا نظر اٹ بظاہر ہر پاکستانی ڈوہدار ءِ۔ داادارہ تینا جوڑ مننگ آن داسکان کرپشن نا برخلاف کاریم کننگ ءِ ولے ہچ ءُ نتیجہ اس بتنے۔ کرپشن اٹ بیرہ سیاستدان تا پن بریک۔ اوپارے کہ پارٹی کارندہ غاک نوکاپ اٹ زہمی بندغ آتا مون آ برسا خذمت ءِ کیر، حکومت نا انتظار ءِ کپس۔ اوپارے کہ سلمان رشدی تون انتس کہ مس او امت مسلمہ نا ردعمل ءِ۔ سلمان رشدی نا برخلاف غٹ آن مست توار نن 1988 ٹی ہرفین۔
