اسلام آباد۔ 27 جولائی (اے پی پی) بنجائی وزیر داخلہ رانا ثناء اللہ خان پارینے کہ وزارت داخلہ پنجاب اٹی گورنرراج اکن سمری اس تیاری نا عمل نا بناءِ کرینے ، عدالتی فیصلہ غان پد مروک آ گپ وتران و پنجاب اٹی داخلہ غا پابندی خلنگ نا ہیت آک گورنر راج خلنگ کن جواز نا وڑاٹ گنج اسے ءُ، عدالت عظمیٰ نا واکداری تا کمتی نا ہیت ءِ کپننگ اُن، ازخودنوٹس و بینچ انا ٹہیفنگ اٹ ایلو جج آتے ہم سلابتی عمل اٹ اوار کننگ کن امور ریگولیٹ بایدے مرے، داڑآن عدلیہ نا تکریم و شرف اٹی پین ودکی مس، اگہ دُوارہ عمران خان مسلح جتھ اتون اسلام آباد آ پنجاب یا کے پی کے آ بننگ نا کوشست کرے تو اودے ہموڑے توننگک۔ نواز شریف زوت وطن آ پدی بریک بروک آ لس گچین کاری مہم نا کماشی ءِ کیک، تحریک بے پتی آن پد ن لیگ نا فیصلہ ئس کہ الیکشن کین، سیوتی جماعت و محب وطن مخلوق نا مشورہ غان پد شہباز شریف زمواری ءِ امنا کریسس۔ اوچارشنبے نادے آ اسلام آباد پولیس لائن اٹی دود آن پد صحافی تتون گپ وتران کریکہ۔ وزیرداخلہ رانا ثناء اللہ خان پارے کہ تدوک آ دے عدالت عظمیٰ نا فیصلہ غان پد ہراوڑنا گپ وتران برجاءِ اسہ وکیل اس مرسا بھاز افسردہ اُٹ، ڈکھیائی نا ہیت اسے کہ داوڑنا گپ وتران مننگ ءِ ہراٹی وزن و جواز فراوان مننگ ءِ بنچ فکسنگ نا ہیت و اسہ سینئر جج اسے نا چٹھی نا مندرجہ غاک بھاز افسوزناک ءُ، دا اسہ لمحہ فکریہ سے کہ نن ہراکنڈآ ہِننگ اُن، شرفمند و معتبر ادارہ غاتیٹی داوڑنا فضابایدے مف۔ اوپارے کہ دا اسہ حقیقت اسے کہ حمزہ شہباز197 وونٹ ہلسا وزیراعلیٰ گچین مس، اوکان پد منحرف باسک آتا وونٹ ءِ کشنگا، آرٹیکل 63 اے انا بابت اٹ فیصلہ ءِ ارٹ میکو جماعت نا طالب علم اس ہم خواننگ و پہہ مننگ کیک۔ عدالت عظمیٰ اولیکو پارٹی لیڈر نا بارواٹ فیصلہ بنفک و ولدا پارلیمانی لیڈر نا بارواٹ فیصلہ بریک، بطور وکیل ہُننگ اُٹ کہ دا فیصلہ غاتیٹی زیات پائیداری اف، عدالت عظمیٰ نا تدوک آدے انا فیصلہ نا رداٹ 25 قومی اسمبلی نا باسک بحال مسنو، داوڑنا فیصلہ غاتیان پیچیدگی ود، سیاسی نزوری آن زرگزرانی نزوری مننگ ءِ ہراڑآن ڈالر جُپ خلنگ ءِ ، نن تینا لوز آتے محدود کننگ اُن تانکہ عدلیہ نا شرف پک مرے۔ اوپارے کہ آجو، غیر متنازعہ ، باعزت و بے کنڈ ہلوک عدلیہ ملک انا بنداوی گرج ءِ ہراڑآن بیدس راج مون آ ہِننگ کپک۔ اسہ سوج اسے نا ورندی ٹی وزیرداخلہ رانا ثناء اللہ خان پارے کہ عالم دین تا اسہ ڈل اسے نا کابل نا دورہ و ٹی ٹی پی تون گپ وتران نا حوال ءِ، دا دورہ عالم دین تے ذاتی حیثیت اٹ دورہ اسے۔ پیپلزپارٹی نا کنڈآن عدالت عظمیٰ نا واکداری تا بارواٹ سلاہ بابت اسہ سوج اسے نا ورندی ٹی او پارے کہ جج آتا واکداری تا کمتی نا ہیت ءِ کتو و نئے داوڑسلاہ کننگا کہ پیشن آن مداخلت اس مرے، بیرہ ازخودنوٹس نا باندات اٹی سنگت جج آتا سلابت، بنچ انا ٹہیفنگ اٹ سنگت جج آتا سلابت نا امور بایدے ریگولیٹ مرے، داڑآن عدلیہ نا تکریم و شرف اٹی پین ودکی مس۔ اسہ سوج اسے نا ورندی ٹی اوپارے کہ بنجائی حکومت نا اہم ءُ کڑد اس مریک، سندھ و بلوچستان اٹی سیوتی جماعت آتا حکومت آک و صوبہ غاتیٹی ہم بنجائی ادارہ غاک کاریم کننگ ءُ، داوڑناہیت کروک آتے شعور اف، ہیت عدالتی فیصلہ غان پد مننگ ءِ و گڑاس آوارہ گپ وتران نا عادتی مخلوق ءِ کنا کلہو ءِ کہ پنجاب اٹی گورنر راج نا سمری آ وزارت داخلہ ٹی کاریم بناکرینے، کنا پنجاب آ داخلہ غا پابندی ہی گورنرراج اکن جواز نا وڑاٹ گنج اسے۔
