اسلام آباد۔ 27 جولائی (اے پی پی) اسپیکر قومی اسمبلی راجہ پرویز اشرف پارینے کہ پائیدار شونداری ہدف آتا دوئی کننگ قومی اولیت ءِ، ملک ءِ داوخت آ، موسمیاتی بدلی، جان جوڑی ، تعلیم، زرگزران ، صنفی بے بریبری و راجی شونداری نا بشخ آتیٹی چیلنج مون تروک ءِ، دا ویل آتا ایسری کن ننے غٹ ءِ اسہ ایلو نا گام اتون گام ہرفسا چلینگوئی مریک، قومی احتساب و گچین طرز حکمرانی غٹ جہانی ہدف آتے دوئی کننگ اٹ کمکارجوڑ مننگ کیک۔ چارشنبے نادے آ داخیال آتا درشانیءِ او ایس ڈی جیز نا کنڈآن اڈ ہلوک اِرا دے ئی کانفرنس نا بنائی دیوان آن تران کرسا کرے۔ اسپیکر قومی اسمبلی پارے کہ پاکستان پائیدار شونداری ہدف آتا دوئی کننگ کن 2030 اسکان نا ایجنڈا کن عزم انا درشانی ءِ کرے۔ 2016 ٹی امنائی قرارداد نا کمک اٹ تینا قومی شونداری ناایجنڈا نا وڑاٹ ہدف آتے طے کریسن ولے کوویڈ۔ 19 جہانی زرگزران و ننا شونداری و شونہالی کن اسہ بھلو دھچکہ اسے۔ پائیدار شونداری نا نفاذ ءِ زہمی کروک آ چندی سوب آک ءُ ہرافتے ٹی موسمیاتی بدلی، جان جوڑی ، اقتصادی شونداری، نیزگاری ، صنفی بے بریبری و راجی وا قتصادی چیلنج آک اوار ءُ۔ اوپارے کہ ایس ڈی جیز نا پوروی کن کاریم کننگ و ایجنڈا 2030 نا دیانتدارانہ ڈیک المی ءِ۔ 2021 نا پائیدار شونداری نا ہدف آتا انڈیکس نا درجہ بندی نا رداٹ پاکستان 165 ملک آتیٹی 129 می نمبر آٹے ہرانا جم اسکور 58 درسد ءِ، بنداوی وڑاٹ 17 ہدف آتیان اسٹ آ اونا پیش رفت ءِ۔ اوپارے کہ ایس ڈی جیز کن قومی گورننس ہموتم گچین مننگ کیک ہراتم جہانی گورننس نا رداٹ نن لائحہ عمل اس اختیار کینہ۔ راجہ پرویز اشرف پارے کہ پاکستان اسہ پدتموک ءُ ملک اسے ہراڑے لکھ آ مخلوق بیدس کن و خور آن خاچک۔ ننے داہیت ءِ ہم پک کروئی مریک کہ ننا چناک المی غذائی گڑاتیان محروم سلپس ، چناتا غذائی گڑاتیٹی کمتی اوفتا نشوونما ٹی براہ راست اڑاند جوڑ مننگ کیک۔ راجہ پرویز اشرف پارے کہ پاکستان اٹ الس ءِ جان جوڑی نا بشخ اٹی ویل آتامون تروک ءِ، جان جوڑی نا بشخ اٹی خذمت اسکان بھاز کم رسینگ اسہ بھلو ویل اسے۔ بطور کانود ساز یہ ادارہ دا ننا زمواری ءِ کہ نن غٹ ءِ اسہ وڑ و آب اٹ جان جوڑی نا خذمت آتا فراوانی ءِ پک کین۔ اوپارے کہ پاکستان اسہ ہندن ءُ ملک اسے ہرا کیہی دہائی آن سیاسی و زرگزرانی تنکی تا گواچی ءِ۔ قدرتی آفت آتا اثرآتون اوار اوار داحالیت آک ملک اٹی غذائیت نا کمتی ءِ اسہ بھاز بھلو گڑتی اسے نا سوب جوڑ کرینو، تدوک آ کیہی سال آتیٹی ملک اٹی غذائی رکھ ءِ گچین کننگ کن گام گیج کننگانے۔ دا بشخ اٹی ساڑی چیلنج آتا داتم اسکان مون ءِ توننگ تنے۔ پائیدار شونداری نا ہدف آتا دوئی کننگ آن زرگزران، جان جوڑی، تعلیم، بریبری و راجی شونداری آ مثبت اثرمرتب مننگ کیک۔ اوپارے کہ پاکستان تینا جغرافیائی محل و وقوع نا سوب آن موسمیاتی بدلی آن بھاز زیات زہمی مسنے، ننے اواری اٹ اینو تینا چاگڑد نا رکھ انا قول ءِ کروئی مریک و تینا بروک آ چین تیکن اسہ گچین ءُ آخبت اس ہلوئی مریک۔ اوپارے کہ پائیدار شونداری ءِ پک کننگ کن گام گیج اولیت ءِ، آب و وہوا نا رکھ ہم المی ءِ۔ اوپارے کہ ایس ڈی جیز نا دوئی کننگ کن اسہ قومی بجٹ اس جتا کرسا غٹ 17 ہدف آتے قابل حصول جوڑ کننگ مریک۔ اوپارے کہ قومی احتساب و گچین طرز حکمرانی غٹ جہانی ہدف آتے دوئی کننگ اٹ کمکار جوڑ مننگ کیک۔
