اسلام آباد۔ 07 جولائی (اے پی پی) وزیراعظم نا کماشی ٹی انرجی ٹاسک فورس انا دیوان اٹی فیصلہ کننگانے کہ قومی سولر انرجی پالیسی نا پڑو ءِ یکم اگست آ کننگک، پالیسی نا نفاذ مشترکہ مفادات کونسل نا منظوری تون مشروط مریک، وزیراعظم ہاؤس و وزیراعظم آفس ءِ اسہ تُو انا تہہ ٹی شمسی توانائی آ گدریفنگک وخت اس کہ وزیراعظم شہباز شریف پارینے کہ الس ءِ اڑزآن و چاگڑد دوست بجلی نا فراوانی حکومت نا اولیت ءِ، شمسی توانائی نا کاریم اٹ اتنگ آن ڈسٹری بیوشن لاسز بجلی نا دُزی و گردشی وام کون آ ویل آتا مون تروئی تمپک، حکومت نا کوشست ءِ کہ ملک ءِ توانائی نا بشخ اٹی خودکفیل کے، انرجی ٹاسک فورس انا بڑزکو کہولی دیوان پنچ شنبے نادے آ داڑے مس ، دیوان اٹی بنجائی وزیر توانائی انجینئر خرم دستگیر ، بنجائی وزیر خزانہ مفتاح اسماعیل ، بنجائی وزیر ڈٹ بندی احسن اقبال ، بنجائی وزیر حوالکاری و شینکاری مریم اورنگزیب، وزیر مملکت پیٹرولیم مصدق ملک و تعلقدار بڑزکو آفیسر آک بشخ ہلکر۔ ہر چار آ صوبہ غاتا چیف سیکرٹریک بذریعہ وڈیو لنک دیوان اٹی بشخ ہلکر۔ دیوان اٹی ملک اٹی شمسی توانائی نا مون آ دننگ نا بابت کروک آ گام گیج آتیا سرجم حوال تننگا۔ وزیراعظم محمد شہباز شریف پارے کہ شمسی توانائی بجلی ودی کننگ نا اسہ ساف، اڑزآن و چاگڑد دوست ذریعہ ءِ۔ شمسی توانائی آن ودی کروک آ بجلی اڑزآن مریک و الس آ کبینی نا بھاریم کم مریک۔ داگڑاءِ مون آ تخسا نن پاکستان نا اولیکو جوان سولر انرجی پالیسی اس مون آ اتنگ اُن۔ داپالیسی نا نفاذ صوبہ غاتا سلابت اٹ مریک۔ حکومت نا کوشست ءِ کہ ملک ءِ توانائی نا بشخ اٹی خودکفیل جوڑ کننگے۔ دیوان ءِ پاننگاکہ ملک اٹی ایندھن آن چلینگوک آ پاور ہاؤس آتے شمسی توانائی آ گدریفنگ نا سلاہ غا سجفنگ انگ ءِ۔ دیوان ءِ مستی پاننگاکہ 11 کے وی نا 2000 فیڈر آتیا شمسی توانائی نا پیدوار نا سلاہ ہم زیر غور ءِ۔ داکان بیدس مچ آ ملک اٹی سرکاری ماڑی تا شمسی توانائی آ گدریفنگ نا سلاہ نا بابت دیوان اٹی سرجم جاچ ءِ ہلنگا۔ دیوان ءِ پاننگاکہ بروک آ 10 سال اٹی سرکاری ماڑی تیا 1000میگاواٹ اسکان نا شمسی توانائی ودی کننگ نا پلانٹ خلنگک ہراکہ جوڑ کبو، چلیفبو و گدریفبو نا بنداو آ مریک۔ داکان بیدس بی ٹو بی سولر ویلنگ و منی سولر گریڈ نا سلاہ تیا ہم سجفیر۔ دیوان ءِ مستی پاننگاکہ ملک اٹی ٹیوب ویل آتا سولر ائزیشن ہم کننگک۔ دا چرجوئی ٹی حکومتی فنڈنگ آن بلوچستان اٹی ٹیوب ویل آتے شمسی توانائی آ گدریفنگ نا ڈٹ زیر غور ءِ ہرانا کمک اٹ صوبہ ٹی 30 ہزار ٹیوب ویل آتے شمسی توانائی آ گدریفنگک۔ دا ڈٹ آ 300 بلین روپئی نا خڑچ بریک۔ دیوان ءِ مستی پاننگاکہ شاری تے شمسی توانائی ودی کننگ نا پلانٹ، ہرافتے ٹی نیٹ میٹرنگ نا آسراتی ہم ساڑی مرے، تننگ آ سجفنگ انگ ءِ۔ وزیراعظم سولر انرجی ٹاسک فورس انا سلاہ تا ستاءِ کرسا پارت کرے کہ غٹ صوبہ غاتے دا سلاہ تیان معلومدار کرسا اوفتا سلاہ ءِ ہلنگے و داہیت ءِ پک کننگے کہ گیگ بدل توانائی نا غٹ ڈٹ آتیٹی صوبہ غاتا ہم گرنچی مرے۔ دیوان اٹی دا فیصلہ کننگاکہ یکم اگست آ قومی سولر انرجی پالیسی نا پڑو ءِ کننگک ولے دا پالیسی نا نفاذ مشترکہ مفادات کونسل نا منظوری تون مشروط مریک۔ دیوان اٹی دا فیصلہ ہم کننگاکہ ہلہلہ ئی بنداو تیا وزیراعظم ہاؤس و وزیراعظم آفس نا ماڑی تے شمسی توانائی آ گدریفنگک۔ دا چرجوئی ٹی تعلقدار کمامدار آتے پرمان جاری کننگانے۔
