کوئٹہ۔08جولائی (اے پی پی) صوبائی وزیر کشت و کشار میر اسداللہ بلوچ پارینے کہ بلوچستان اٹی ساڑی آ بشامی آ پر و نوکاپی ریلہ غاتیان ودی مروک آ حالیت آتون مون تننگ کن کشاری انجینئر و ایلو عملہ تینا علاقہ غاتیٹی حاضری ءِ پک کرسا پی ڈی ایم اے و ضلعی انتظامیہ تون اواری اٹ کمکی کارروائی تیٹی بشخ ہلیر، دا چرجوئی ٹی ڈیوالئی و لاپرواہی سے سگنگ پننگک۔دا خیال آتا درشانی ءِ صوبائی وزیر کشت و کشار میر اسداللہ بلوچ جمعہ نا دے آ “اے پی پی” تون خصوصی گپ وتران کرسا کرے۔ اوپارے کہ بلوچستان اٹی بشامی آ پِر و نوکاپی ریلہ غاتیان بھلو کچ اسے ٹی بھسکاری مسنے، دا اسہ قدرتی ءُ آفت اسے، ہراڑتون مون تننگ اسہ انسان اسے نا وس اٹی اف، ننے غٹ ءِ اواری اٹ دا مشکل نا ساہت اٹی تینا زہمی ایلم تا کمک کن مون آ بروئی مریک۔ اوپارے کہ کشاری انجینئر آک تینا تینا ضلع غاتیٹی ڈیوٹی آ ساڑی مریر و ساڑی آ بشامی آ پِر و نوکاپی ریلہ غاتیان ودی مروک آ ہلہلہ ئی حالیت آتون وخت آ مون تننگ کن ضلعی انتظامیہ و پی ڈی ایم اے تون پبی کمک کرسا کمکی کاریم تیٹی بشخ ہلیر و محکمہ کشت و کشار نا بلڈوزر و ایلو مشینری تے ہروڑنا حالیت آتیٹی کاریم اٹ اتنگ کن تیار تخنگے داچرجوئی ٹی ڈیوالئی ءِ سگنگ پننگک۔ میر اسد بلوچ ساڑی آ پِر و نوکاپی ریلہ غاتیان جانی و مالی نسخان تیا است ہسونی نا درشانی ءِ کرسا زوال کروک آ بندغ آتا خاہوت آتون ہمدردی نا درشانی ءِ کرے۔
