اسلام آباد۔ 26اپریل (اے پی پی)وزیراعظم نا سلاہکار قومی تاریخ و ادبی میرات عرفان صدیقی پارینے کہ علامہ اقبال نا کلہو ہردور اٹی زندہ مسنے انتئے کہ دا اومیت، کوشست، ہمت و زند انا کلہو اسے۔ علامہ اقبال سویلی ایشیاءنا مسلمان تے ہی بیدار کتو بلکن مچ آ دنیا نا انسان تے آجوئی نا تڑپ و غلامی نا برخلاف جنگ کننگ نا است تس۔ سوگو و متحد قوم جوڑ مننگ کن قائد اعظم و علامہ اقبال نا افکار آن راہشونی نا سخت گرج ئِ۔ داہیت ئِ او ایوان قائد اٹی نظریہ پاکستان کونسل نا کنڈآن علامہ اقبال نا نادر عکس آتا نمائش نا افتتاح ئِ کرسا پارے۔ عرفان صدیقی پارے کہ اینو علامہ اقبال نا کلہو ئِ لس کننگ و خاص کر پوسکن آ نسل اسکان سرکننگ نا سخت گرج ئِ ہراڑکن قومی تاریخ و ادبی میرات نا وزارت منظم ڈٹ بندی کرینے۔ اوپارے کہ اسہ سوگو و یکجاقوم اس جوڑ مننگ کن قائد اعظم و علامہ اقبال نا افکار آن راہشونی دوئی کننگ نا سخت گرج ئِ۔ سلاہکار وزیراعظم قائداعظم و علامہ اقبال نا فکر انا مون آ دننگ کن نظریہ پاکستان کونسل نا کوشست آتا ستائِ کرے۔
