اسلام آباد۔ 16 اپریل (اے پی پی) وزیراعظم محمد شہباز شریف پارینے کہ پاکستان نا افرادی قوت ءِ جہانی آب انا کسب و تربیت آن شُپ کننگ کن حکومت اولیتی بنداوتیا گام گیج کننگ اٹی ءِ۔ چارشنبے نادے آ وزیراعظم آفس نا میڈیاونگ آن جاری بیان نا رداٹ داخیال آتا درشانی ءِ او ایسوسی ایشن آف چارٹرڈ سرٹیفائیڈ اکاؤنٹنٹس (اے سی سی اے) نا ہفت باسکی ڈل اتون گپ وتران کرساکرے ہرا جہانی چیف ایگزیکٹیو ہیلن برانڈ نا کماشی ٹی اوڑتون اوڑدہی کریر۔ اوڑدہی ٹی نائب وزیراعظم و وزیرخارجہ محمد اسحاق ڈار ، بنجائی وزیرآک خالد مقبول صدیقی، احمد خان چیمہ، سلاہکار وزیراعظم سید توقیر شاہ، چیئرمین ایچ ای سی ڈاکٹر مختاراحمد و تعلقدار بڑزکو کمامدارآک بشخ ہلکر۔ وزیراعظم ڈل ءِ پاکستان آ بننگ آ بخیرکرساپارے کہ پاکستان نا خوش بختی ءِ کہ اللہ رب العزت اودے ورناولائخ آ افرادی قوت تس۔ پاکستان نا افرادی قوت ءِ جہانی آب انا کسب و تربیت آن شُپ کننگ کن حکومت اولیتی بنداو تیا گام گیج کننگ ءِ۔ شفافیت و گورننس نا گچینی کن تھرڈ پارٹی ویلیڈیشن سرکاری بشخ انا ہرڈٹ آتا بنداوی جزو ءِ۔ حکومتی کارکڑد و گورننس نا گچینی حکومت نا اولیتی ہدف آتیٹی اوار ءِ ۔ وزیراعظم پارے کہ ’’فچ‘‘ انا کنڈآن پاکستان نا زرکاری درجہ بندی ٹی گچینی ستاکڑزک، ولے ننے داسکان پین خواری کروئی ءِ۔ جہانی کہول آ پاکستانی افرادی قوت نا مسابقت اٹی گچینی کن ایسوسی ایشن پوسکن آ کسبی مہارت آتا تربیت اٹی اہم کڑد ادا کننگ کیک۔ اوپارے کہ حکومت ءِ پاکستان ایسوسی ایشن نا کنڈآن حکومتی ادارہ غاتا کچ ءِ ودفنگ نا است بڈی ءِ کیک۔ وزیراعظم تعلقدار کمامدارآتے ایسوسی ایشن تون کمکاری ٹی ودکی و آخبت نا لائحہ عمل کن مذاکرات نا پارت کرے۔ ڈل وزیراعظم ءِ اے سی سی اے نا پاکستان اٹ تاریخ و ملکی زرگزران نا شونداری کن اونا کڑد انا بابت معلومدار کرے۔ ڈل پارے کہ اے سی سی اے نا پاکستان آن تعلق تخوک آ 13 ہزار باسک مچ آ دنیا ٹی چندی بشخ آتیٹی تینا خذمت آتیان ملک و قوم انا پن ءِ روشنا کننگ ءُ وخت اس کہ 40 ہزار خوانوک آ مار و مسنک داوخت آ ممبر شپ نا دوئی کننگ کن خواننگ ءُ۔ ڈل ہائیر ایجوکیشن کمیشن نا کنڈآن اے سی سی اے باسک آتے ماسٹر نا ڈگری نا ایکولینس تننگ آ منت واری ءِ ہرفے۔ ڈل پاکستان نا گرین اکانومی ٹرانسفارمیشن پلان اٹی پبی کمکاری نا است خواہی نا درشانی ءِ کرے۔ ڈل پارے کہ ایسوسی ایشن دنیا ناپائیدار آخبت، چاگڑدی بدلی نا مضراثرآتیان بچنگ ، اکاؤنٹینسی و آڈٹ نا بشخ آتیٹی جدت، کارپوریٹ بشخ انا خذمت آتا آؤٹ سورسنگ و ایلو پوسکن آ گام گیج آتیکن پاکستان نا حکومت تون اواری اٹ کاریم کننگ نا خواہندار ءِ ۔ ڈل وزیراعظم نا کماشی ٹی پاکستان نا زرگزران نا شونداری نا بابت سرسہبی تیا حکومتی ٹیم نا ستاءِ کرے۔ ڈل حکومت نا محصولات اٹی ودکی، نظام اٹی شفافیت کن گام گیج و کچ اٹی ودکی کن کمکاری ٹی بھاز است خواہی نا درشانی ءِ کرے۔
