اسلام آباد۔ 16 اپریل (اے پی پی) وزیراعظم محمد شہباز شریف پاکستان نا کشاری بشخ ءِ بدل کننگ نا عزم انا درشانی ءِ کرساپارینے کہ پائیدار اقتصادی شونداری کن کشاری بشخ ءِ پوسکن آ وڑتتون ہم گرنچ کننگ المی ءِ، ہندا چرجوئی ٹی اسہ ہزار کشاری گریجویٹ آتے ٹریننگ آ چین آ گدریفنگ انگ ءِ ہرافتا میرٹ آ گچین کاری ءِ کننگانے، چین اٹی پوسکن آ کشاری ٹیکنالوجی آن فائدہ ہرفسا وطن آ پدی برسا ننا ورناک کشاری شونداری ٹی پبی کڑد ادا کیرہ، پاکستان اٹی خلقی کہول آ چنکا صنعت آتا مون آ دننگ و ویلیو ایڈیشن کن ورناتے آسان شڑت آتیا وام ایتنہ۔ اوچارشنبے نادے آ داڑے ’’وزیراعظم محمد شہباز شریف ‘‘نا کشت وکشار نا بشخ انا کچءِ ودفنگ کن 1000 کشاری گریجویٹ آتے بڑزکو تربیت کن اسکالرشپ آ چین آ گدریفنگ نا ڈٹ انا اولیکو ریسہ ٹی 300 خوانوک آ مارتے چین آ گدریفنگ نا چرجوئی ٹی اڈہلوک دود آن تران کریکہ۔ دود آن پاکستان اٹی چین نا سفیر جیانگ زیدونگ، بنجائی وزیر غذائی پٹ وپول و شونداری رانا تنویر حسین ئسک ہم تران کریر و چین آ ہنوک آ طالب علم آک ہم تینا تاثر آتیان بشخ ہلوک آتے معلومدار کریر۔ وزیراعظم تینا تران اٹی پارے کہ اینو اہم ءُ دےا سے ہراتم ننا ورناک گریجویٹ سنگت ملک چین اٹی پوسکن آ کشاری ٹیکنالوجی آن فائدہ ہرفنگ کن ہِننگ ءُ و اومیت ءِ کہ او پدی برسا تینا دا آزموندہ غان ملکی کشاری شونداری ٹی کڑد ادا کیرہ۔ اوپارے کہ نن دورہ ءِ چین انا وخت آ دا پوسکن آ کشاری یونیورسٹی نا دورہ ءِ کرین وہموجاگہ نا پٹ وپول و شونداری کاریم تے ہران، ہرامتاثرکن ئس۔ داوخت آ نن فیصلہ کرین کہ اسہ ہزار کشاری گریجویٹ آتے دا آزموندہ غان فائدہ ہرفنگ کن دانگیا گدریفنہ۔ اوپارے کہ پاکستانی تیکن چین اٹی دا آسراتی نا فراوانی آ نن چینی سرکڑدہ غاتا منت وار اُن و اوفتے کن نیک است خواہی نا درشانی ءِ کینہ۔ اوپارے کہ پاکستانی خوانوک آ چناک چین و پاکستان نا نیام اٹ پول انا کڑد ادا کیرہ۔ اووزیر و سیکرٹری آئی ٹی نا طالب علم آتا سلیکشن کن پورٹل اس جوڑ کننگ تون اوار کمکاری آ اونا ہم منت واری ءِ ہرفے۔ اوپارے کہ اِراوار دا پروگرام ءِ ڈراپ کننگا، نن ورناک ہراقوم انا اومیت ءُ اوفتے گدریفنگ خواہانہ ولے اولیکو وار سرکاری ملازم آتا بھلو کچ اس داٹی اوار ئس ہرافتیان گیشتر 50 سال آن زیات وئی نا ئسر۔ اوفتا آزموندہ شرف نا لائق ءِ ولے آزموندہ تون ورناتا توانائی ہم اوار کننگ نا گرج ئس۔ ہندا وڑ ارٹ میکو کوشست ہم دا آب انا الوکہ ہرانا اومیت ئس ولدا وزارت آئی ٹی پورٹل اس جوڑ کرے و اینو دا ریسہ پورو مس۔ داٹی ہرچار آ صوبہ، گلگت بلتستان، آزادکشمیر آن ہم ورناک شریک ءُ، داوخت آ وزیراعظم گچین کاری کن میرٹ نا بارواٹی ورناتیان ہم اَرفے و ورناک اونا ستاءِ کریر ۔ وزیر اعظم پارے کہ دا ڈٹ اکن 3 ارب روپئی جتا کننگانے۔ بروک آ اِرا ریسہ غاتیٹی ہم میرٹ ءِ مون آ تخنگک۔ بلوچستان نا 10 درسد ودکی کوٹہ ءِ تخنگانے۔ اوپارے کہ پاکستان چار اکائی تیا تالان بنجاءِو ہراتم اسکان چار انگا اکائیک بریبرشون ہلپسہ پاکستان شونداری نا کنڈآ ہِننگ کپک۔ پاکستان نا شونداری ہمووخت آ مریک ہراتم ہرچار آ صوبہ غاک اواری اٹ شونداری ٹی کڑد ادا کیرہ۔ وزیراعظم پارے کہ چین نا خڑکی سنگت ملک ءِ و نازرک وارخواہی تیا چین نا لازوال کڑد ءِ، چین پاکستان نا مشکل وخت انا سنگت ءِ و مشکل وخت انا سنگت ءِ اسُل بایدے است آن دننگپ۔ سعودی عرب ، یواے ای و قطرداغٹ مشکل وخت انا سنگت ءُ۔ اوپارے کہ ورناک تربیت اٹی چین اٹی عرق ریزی و خواری اٹ ہموجاگہ نا آزموندہ غاتیان فائدہ ہرفر و پدی برسا دا ٹیکنالوجی ءِ داڑے کاریم اٹ اتیر تانکہ کشاری پیدوار اِراہنداخہ مرے۔ اوپارے کہ ننے تینا کشاری پٹ وپولی ادارہ غاتے بحال کروئی ءِ۔ جواں دتر و آزموندہ اواری اٹ دا کشاری پٹ وپولی مرکز آتے گچین کرسا پاکستان نا کشاری شونداری ءِ چارچاند خلنگ کیرہ۔ اوپارے کہ پورو یقین ءِ کہ داورناک نئے بیرہ تینا لمہ و باوہ نا خواری و اومیت آتیا پورو سلرہ بلکن پاکستان نا شونداری و شونہالی ٹی انقلاب اس اتنگ کن پبی خواری کیرہ۔ اوپارے کہ تربیت اٹی مشینی کشارگری ٹی گچین لائخی دوئی کروئی ءِ، ڈیجیٹلائزڈ کراپ مینجمنٹ، چاگڑد دوست سیڈز، و خلقی علاقہ غاتیٹی سمال میڈیم کرپاس انڈسٹری نا بے پناہ وارخواہی ساڑی ءِ، داڑکن ورناتے آسان شڑت آتیا وام ایتنہ۔ کولڈ سٹوریج مفننگ نا سوب آن ننا خلقی علاقہ غاتیٹی بھلو کچ اسے ٹی میوہ زیان مننگ ءُ۔ داگام گیج آتیان خلق آتیٹی زند بدل مریک ہموڑے چنکا صنعت کن ڈٹ اس جوڑ کرینن، صوبہ غاتون اواری اٹ ورناتے وام ایتنہ، ہموڑے باغ تیا چکار و ویلیو ایڈیشن نا کنڈآ کانہ۔ ننے سازگار چاگڑد اس تروئی ءِ۔ داوخت آ وزیر نیشنل فوڈ سیکورٹی اینڈ ریسرچ رانا تنویرحسین پارے کہ وزیراعظم شہباز شریف نا کماشی ٹی حکومت کشت وکشار و لائیو اسٹاک نا بشخ آتیٹی پیدواری لائخی تے ودفنگ کن کوشست کننگ ءِ۔ اوداہیت ءِ مون آ تخاکہ حکومت ورناکشاری گریجویٹ آتے چین آن تینٹ علم و آزموندہ فراوان کننگ کن 3 ارب روپئی آن زیات خڑچ کننگ ءِ۔ اواومیت ظاہر کرے کہ دا گریجویٹ آک وطن آ پدی برسا تینا لائخی و علم ءِ گچین وڑاٹ کاریم اٹ اتیرہ۔ پاکستان اٹی چین نا سفیر جیانگ زیدونگ پارے کہ او تدوک آ اسہ سال اٹی حکومت پاکستان نا کارکڑد آن بھاز زہمی ءِ ہراٹی ملک انا میکرواکنامک ٹک آتیٹی نمان گچینی بسنے۔ اوپارے کہ چینی حکومت پاکستان تون ہڑتوم آ کنڈآتا تعلقداری خاص کر کشت وکشار نا بشخ اٹی کمکاری کن تیار ءِ۔ اوداہیت آ زور شاغا کہ صدر شی جن پنگ مدام ہمسایہ ملک آتون تینا تعلقداری تے بھاز اہمیت ایتک۔ چین پاکستان اقتصادی راہداری نا رداٹ چین کم و ود 35.4بلین امریکی ڈالر نا براہ راست زرکاری کرینے ہراڑآن ہڑتوم آ ملک آتا نیام اٹ سوگو تعلقداری نا ڈیک ملک۔
