اسلام آباد۔16اپریل (اے پی پی): مزن وزیر محمد شہباز شریف ءَ گوشت کہ حکومت پاکستان ءِ کارکن آناں میاں اوستمانی معیار ءِ مہارت ءُ تربیت ءَ چہ لیس کنگ ءِ واستہ اولویت ءِ بنیاد ءَ گامگیج زورگ ءَ انت۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی ایسوسی ایشن آف چارٹرڈ سرٹیفائیڈ اکاؤنٹنٹس ءِ 7باسکی ڈل ءَ گوں گپ ءُ تران کنان ءَ کتگ ات کہ آئی ءَ وتی گلوبل چیف ایگزیکٹو ہیلن برانڈ ءِ سروکی ءَ آئی ءَ گوں گند ءُ نند کتگ ات۔ گند ءُ نند ءَ نائب مزن وزیر ءُ دری کارانی وزیر محمد اسحاق ڈار، بنجاھی وزیر خالد مقبول صدیقی، احد خان چیما، مزن وزیر ءِ مشیر سید توقیر شاہ، چیئرمین ایچ ای سی ڈاکٹر مختار احمد ءُ سیادی داروکیں مزنیں کارندہ آں بہر زرتگ۔ مزن وزیر ءَ پاکستان ءَ ڈل ءَ را وش اتک کنان ءَ گوشت کہ پاکستان وش بھت انت کہ اللہ تعالیٰ ایشی ءَ را ورنا ءُ باصلاحیتیں کارکنیں ٹولی ءِ نعمت داتگ۔ حکومت پاکستان ءِ کار ءِ توان ءَ را میاں اوستمانی تک ءِ ہنر ءُ تربیت ءَ چہ لیس کنگ ءِ واستہ اولویت ءِ بنیاد ءَ گامگیج زورگ ءَ انت۔ سیمی فریق ءِ توثیق ہر سرکاری شعبہ ءِ منصوبہ ءِ یک بنیاتی جز ءِ انت کہ شفافیت ءُ حکومت داری ءَ را گہتر کنگ بہ بیت۔ حکومت ءِ کارکردگی ءُ حکومت داری ءِ گہتری حکومت ءِ اولی مول ءُ مراد آنی تہ ءَ ھوار اِنت۔ مزن وزیر ءَ گوشت کہ فچ ءِ نیمگ ءَ پاکستان ءِ سرمایہ کاری ءِ درجہ بندی ءِ تہ ءَ گہتری وش اتک انت، بلے انگت مارا گیش محنت کنگی انت۔ اے انجمن پاکستانی کارکن آنی مقابلہ ءِ توانائی ءَ را جہانی تک ءَ گہتر کنگ ءِ واستہ نوکیں پیشہ وارانہ مہارت آنی تربیت ءِ تہ ءَ ھاسیں کرد پیلو کنت۔ آئی ءَ گوشت کہ پاکستان ءِ حکومت سرکاری ادارگ آنی صلاحیت ءَ را گیش کنگ ءِ واستہ انجمن ءَ را دلبڈی دنت۔ مزن وزیر ءَ سیادی داروکیں واک آناں پنت ءُ شون کت کہ انجمن ءِ گوما کمک ءَ گیش بہ کن اَنت ءُ آیوکیں کارروائی ءِ سر ءَ ھیال ریچی بہ کن اَنت۔ ڈل ءَ مزن وزیر ءَ را پاکستان ءَ اے سی سی اے ءِ راجدپتر ءُ ملکی معیشت ءِ دیمروئی ءِ تہ ءَ ایشی ءِ کرد ءِ بابت ءَ سرپد کت۔ ڈل ءَ گوشت کہ پاکستان ءَ چہ 13 ہزار اے سی سی اے ءِ باسک دگنیا ءَ جتاجتائیں پڑ آنی تہ ءَ وتی ازمت آنی گوما ملک ءُ راج ءَ را نامدار کنگ ءَ انت وھدیکہ اے وھد ءَ چل ہزار نودربر باسک ءِ گرگ ءِ واستہ وانگ ءَ انت۔ ڈل ءَ ہائیر ایجوکیشن کمیشن ءِ منت گپت کہ آئی ءَ اے سی سی اے ءِ باسک آناں ماسٹرز ءِ ڈگری ءِ برابری داتگ۔ ڈل ءَ پاکستان ءِ گرین اکانومی ٹرانسفارمیشن پلان ءِ تہ سرجمی ءَ کمک ءِ واھشت ءِ درشان کت۔ ڈل ءَ گوشت کہ انجمن پاکستان ءِ حکومت ءِ گوما دگنیا ءِ واستہ پائیداریں آیوکیں وھد ءِ واستہ کار کنگ ءِ واھشت مند اِنت، موسمیاتی بدلی ءِ زیانکاریں اثر آنی گر ءُ دار، اکاؤنٹنسی ءُ آڈٹ ءِ پڑ ءَ نوکیں چیز جوڑ کنگ، کارپوریٹ سیکٹر ءَ سروسز ءِ آؤٹ سورسنگ، ءُ دگہ نوکیں گامگیج آنی واستہ کار کنگ ءِ واھشت مند اِنت۔ ڈل ءَ مزن وزیر ءِ سروکی ءَ پاکستان ءِ معیشت ءَ را دیمروئی دیگ ءَ حکومتی ٹیم ءِ کامیت آنی سر ءَ توسیپ کت۔ ڈل ءَ سرکاری آمدنی ءِ گیش کنگ، نظام ءِ تہ ءَ شفافیت ءِ گامگیج ءُ صلاحیت سازی ءِ واستہ کمک ءِ تہ ءَ مزنیں دلگوشی ءِ درشانی کتگ۔
