اسلام آباد۔ 16 اپریل (اےپی پی) وزیراعظم محمد شہباز شریف جناح میڈیکل کمپلیکس نا تفنگ نا غٹ ریسہ غاتیٹی سد درسد شفافیت ءِ پک کننگ نا پارت کرساپارینے کہ دا ڈٹ انا تفنگ نا غٹ ریسہ غاتا تینٹ چاروکی ءِ او تینٹ کیک، ڈیزین، سپرویژن و تفنگ نا بابت کنسلٹنٹ و کنٹریکٹر آتا خذمت آتے جہانی ٹینڈر نا کمک اٹ دوئی کننگے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی اسلام آباد اٹی جناح میڈیکل کمپلیکس نا تفنگ نا بابت جاچ دیوان اس اڈہلک۔ داوخت آ وزیراعظم پارے کہ جناح میڈیکل کمپلیکس مچ آڈیہہ اکن گچین طبی آسراتی و پوسکن آ طبی پٹ وپول کن ازباب آتیان شُپ ہسپتال مریک۔ وزیراعظم ڈٹ انا تفنگ نا غٹ ریسہ غاتیٹی سد درسد شفافیت ءِ پک کننگ نا پارت کرے۔ وزیراعظم ڈیزین، سپرویژن و تفنگ نا بابت کنسلٹنٹ و کنٹریکٹر آتا خذمت آتے جہانی ٹینڈر نا کمک اٹ دوئی کننگ نا پارت کرساپارے کہ جناح میڈیکل کمپلیکس نا تفنگ نا غٹ ریسہ غاتا چاروکی ءِ ای تینٹ کیوہ۔ دیوان اٹی وزیراعظم ءِ جناح میڈیکل کمپلیکس اینڈر یسرچ سینٹر نا تفنگ نا پیش رفت نا بابت حوال تننگا۔ حوال اٹی پاننگاکہ جناح میڈیکل کمپلیکس نا تفنگ نا بابت اسٹیک ہولڈر آتا سلابت اٹ پی سی ون ءِ زوت گڈیکو دروشم اس تننگک۔ حوال اٹی پاننگاکہ جناح میڈیکل کمپلیکس نا تفنگ کن کروک آ ٹرسٹ فنڈ اٹی 3.5 ارب روپئی نا بنائی سرمایہ گدریفنگانے۔ 600 کنال رقبہ غا تالان دا جہانی وڑنا اسہ ہزار آن زیات کٹ انا ہسپتال اٹی 9 سینٹرآف ایکسیلینس مریک ۔ دیوان اٹی بنجائی وزیر ڈٹ بندی ڈاکٹر احسن اقبال، بنجائی وزیر کانود و انصاف اعظم نذیر تارڑ، بنجائی وزیر اقتصادی امور احدخان چیمہ، بنجائی وزیرجان جوڑی سید مصطفیٰ کمال ، وزیراعظم نا سلاہکار سید توقیر شاہ، اسلام آبادآن قومی اسمبلی نا باسک انجم عقیل، پروفیسرڈاکٹر سعید اختر و تعلقدار ادارہ غاتا بڑزکو آفیسر آک شریک ئسر۔
