اسلام آباد۔16اپریل (اے پی پی): مزن وزیر محمد شہباز شریف ءَ پاکستان ءِ کشت ءُ کشاری شوبگ ءَ را بدل کنگ ءِ واستہ وتی عزم ءِ یک رندے پدا گوشت کہ پائیدار اقتصادی دیمروئی ءِ واستہ کشت ءُ کشاری شوبگ ءَ را نوکیں لیکہ آنی سر ءَ دیمروئی دیگ المی اِنت۔ اے درگت ءَ یک ہزار زرعی گریجویٹ چین ءَ تربیت ءِ ھاتر ءَ روان دیگ بوھگ ءَ انت کہ آ میرٹ ءِ رد ءَ گچین کنگ بوتگ انت۔ چین ءَ نوکیں زرعی ٹیکنالوجی ءَ چہ سیت چست کنگ ءَ پد مئے ورنا زرعی دیمروئی ءِ تہ ءَ سرجمیں کرد پیلو کن اَنت ءُ پاکستان ءَ کسانیں صنعت آنی دیمروئی ءُ میتگ ءِ تک ءَ ارزشت ءِ گیشی ءِ واستہ ورنا آناں آسانیں شرت آنی سر ءَ وام دات کن اَنت۔ آئی ءَ چار شمبے ءِ روچ ءَ زرعی شوبگ ءِ گنجائش ءَ را گیش کنگ ءِ واستہ مزن وزیر محمد شہباز شریف ءِ یک ہزار زرعی گریجویٹ آناں ہائیر ٹریننگ ءِ واستہ اسکالرشپ ءِ سر ءَ چین ءَ روان دیگ ءِ منصوبگ ءِ اولی بھر ءِ تہ ءَ 300 نودربر چین ءَ روان دیگ ءِ مراگش ءَ گوں گشتانک دیگ ءَ ات۔ پاکستان ءَ چینی سفیر جیانگ زے تونگ ءُ فوڈ ریسرچ اینڈ ڈویلپمنٹ ءِ بنجاھی وزیر رانا تنویر حسین ءَ ہم مراگش ءَ گشتانک دات ءُ چین ءَ شتگیں نودربراں ہم وتی تاثرات مراگش ءِ تہا ھواریں مردماں گوں شیئر کت۔ مزن وزیر ءَ وتی گشتانک ءِ تہ ءَ گوشت کہ مرچی یک ھاسیں روچ اِنت کہ مئے ورنا گریجویٹ جدید کشت ءُ کشاری ٹیکنالوجی ءَ چہ سیت چست کنگ ءِ واستہ چین ءِ دوستیں ملک ءَ روگ ءَ اَنت ءُ امیت اِنت کہ آ واتر کاینت ءُ اے تجربگ ءَ گوں ملک ءِ کشت ءُ کشاری ءِ تہ ءَ کرد ءَ پیلو کن اَنت۔ آئی ءَ گوشت کہ ما چین ءِ تر ءُ تاب ءِ وھد ءَ اے نوکیں زرعی یونیورسٹی ءِ تر ءُ تاب کتگ ءُ اودا پٹ ءُ پول ءُ دیمروئی ءِ کار دیستگ کہ اے جوانیں کار بوتگ۔ اے وھد ءِ تہا ما اے تجربہ ءَ چہ فائدہ چست کنگ ءِ ھاترا 1000 زراعت ءِ گریجویٹاں ادا روان دیگ ءِ فیصلہ کت۔ آئی ءَ گوشت کہ ما چین ءِ سروکی ءِ منت وار آں کہ چین ءَ پاکستانی آنی واستہ اے آسراتی داتگ۔ آئی ءَ گوشت کہ پاکستانی نودربر چین ءُ پاکستان ءِ نیام ءَ پُل ءِ کرد ءَ پیلو کن اَنت۔ آئی ءَ نودربر آنی گچین کاری ءِ واستہ پورٹل جوڑ کنگ ءَ ھوار وزیر ءُ سیکرٹری آئی ٹی ءِ کمک ءِ واستہ ھم منت گپت۔ آئی ءَ گوشت کہ اے پروگرام دو رند ءَ یلہ کنگ بوتگ۔ ما لوٹ اِت کہ ھما ورنا دیم دیگ بہ بنت کہ آ راج ءِ آس اَنت بلے اولی رند ءَ مزنیں کساسے ءَ سرکاری کارندہ ھوار بوت اَنت کہ آیانی تہ ءَ گیشتریں اُمر 50 سال ءَ گیش اَت۔ ایشانی تجربہ احترام ءِ لائق انت بلے تجربہ ءِ ہمراہی ءَ ورناہانی توانائیانی ہم ہوار کنگ ءِ ضلورت بوتگ۔ ھمے رنگ ءَ دومی جھد ھم ھما وڑ ءَ نہ بوتگ کہ چہ آئی ءَ متوقع بوتگ۔ پدا آئی ٹی وزارت ءَ پورٹل جوڑ کت ءُ اے مرحلہ مرچی سرجم بوت۔ اے کار ءَ چاریں صوبہ گلگت بلتستان ءُ آزات کشمیر ءِ ورنا بہر زورگ ءَ اَنت۔ اے موہ ءِ سر ءَ مزن وزیر ءَ ورنا آنی گوما گچین کاری ءِ واستہ میرٹ ءِ بابت ءَ ھم جست ءُ پُرس کت ءُ ورنا آں ایشی ءَ را ساڑات۔ مزن وزیر ءَ گوشت کہ اے منصوبگ ءِ واستہ 3ارب کلدار ایر کنگ بوتگ۔ میرٹ ءِ دیم ءِ دوئیں پڑاں ھم ھیال داری کنگ بیت۔ پہ بلوچستان ءَ گیش 10 درسد کوٹہ دارگ بوتگ ۔ آئی ءَ گوشت کہ پاکستان چار یونٹ آنی سر ءَ جوڑ بوتگیں فیڈریشن اِنت ءُ داں چاریں یونٹ یک وڑ ءَ دیمروئی نہ کن اَنت پاکستان دیمروئی ءِ کشک ءَ دیم ءَ شت نہ کنت۔ پاکستان ءِ دیمروئی ہما وہد ءَ بیت وہدے چاریں صوبہ یکجاہ دیمروئی ءِ تہا کرد پیلو بہ کن انت۔ مزن وزیر ءَ گوشت کہ چین مئے نزیکیں سنگت اِنت ءُ نازرکیں وھد ءَ چین ءِ ابدمانیں کرد ءِ است اِنت۔ چین مشکلیں ساھت ءَ پاکستان ءِ شریک اِنت ءُ مارا مشکلیں ساھت ءَ ھم شریک ءَ ھچبر شموشگ مہ لوٹ ایت۔ سعودی عرب، امارات ءُ قطر درست مشکلیں وھد ءَ شریک اَنت۔ آئی ءَ گوشت کہ ورنا تربیت ءِ وھد ءَ چین ءَ محنت ءُ لگن ءِ وسیلگ ءَ اودا رستگیں تجربگ آناں پائدگ چست بہ کن ءُ پدا بیا ءُ ادا اے ٹیکنالوجی ءَ را کارمرد بہ کن تانکہ کشت ءُ کشاری پیداوار دوگنا کنگ بہ بیت۔ آئی ءَ گوشت کہ مارا وتی کشت ءُ کشاری پٹ ءُ پولی ادارگ آناں زندگ کنگی انت۔ ورنائیں ھون ءُ تجربگ اے کشت ءُ کشاری پٹ ءُ پولی مراگشاں گہتر کت کنت ءُ پاکستان ءِ کشت ءُ کشاری دیمروئی ءَ را گہتر کت کنت۔ آئی ءَ گوشت کہ من ءَ دل یکیمی اِنت کہ اے ورنا نہ ایوک ءَ وتی پت ءُ مات آنی محنت ءُ امیت آنی سر ءَ زندگ بنت بلکینگ ءَ پاکستان ءِ دیمروئی ءُ وشھالی ءِ تہ ءَ انقلاب ءِ آرگ ءِ واستہ سک باز محنت کن اَنت۔ آئی ءَ گوشت کہ تربیت ءِ وھد ءَ آھاں میکانائزڈ فارمنگ، ڈیجیٹل فصل ءِ بندوبست، ماحول دوستیں بیج آنی تہ ءَ جوانیں مہارت ءِ دربرگ لوٹ ایت، دیہی دمگ آنی تہ ءَ کسان ءُ میاں اوستمانی کپاس ءِ صنعت ءِ واستہ بے دروریں موہ است انت، ایشی ءِ واستہ ورنا آناں آسانیں شرت آنی سر ءَ وام دیگ بیت۔ سرد ءِ نہ بوھگ ءِ سوب ءَ مئے میتگ ءُ دمگاں مزنیں کساسے ءَ میوہ گار ءُ بیگواہ بوھگ ءَ اَنت۔ اے گامگیجاں چہ میتگاں زند بدل بیت۔ اودا ٹیکسٹائل ءِ صنعت ءِ ھاتر ءَ منصوبہ جوڑ کنگ بوتگ ءُ صوبہ آنی ھمکاری ءَ ورناہاں وام دیگ بیت۔ اودا ما باغانی سرا دلگوش دئیں ءُ قدر ءُ قیمت ءِ گیشی ءِ نیمگ ءَ روان کنیں۔ مارا یک سازگاریں چاگردے ءِ دیم ءَ آرگ لوٹیت۔ اے موہ ءِ سر ءَ راجی وردن ءُ وراک ءِ رکھینگ ءُ پٹ ءُ پول ءِ وزیر رانا تنویر حسین ءَ گوشت کہ مزن وزیر شہباز شریف ءِ سروکی ءَ حکومت کشت ءُ کشاری ءُ مالداری شوبگ ءَ پیداوار ءِ تہ ءَ گیشی ءِ واستہ کوشست کنگ ءَ انت۔ آئی ءَ اے گپ ءِ سر ءَ زور پر دات کہ حکومت ورنا زرعی گریجویٹ آناں چین ءَ چہ اولی دست ءِ زانت ءُ تجربگ ءِ پجارینگ ءِ واستہ 3ارب کلدار ءَ چہ گیش ھرچ کنگ ءَ اِنت۔ آئی ءَ امیت درشان کت کہ اے گریجویٹ وتی ملک ءَ واتر بوھگ ءَ پد وتی مہارت ءُ زانت ءَ را جوانیں رنگ ءَ کارمرد کن اَنت۔ پاکستان ءَ چینی سفیر جیانگ زے تنگ ءَ گوشت کہ گوستگیں سال ءِ تہ ءَ پاکستانی حکومت ءِ کارکردگی ءَ چہ سک باز متاثر بوتگ، ایشی ءِ ساھت ءَ ملک ءِ میکرو اکنامک اشاریہ آنی تہ ءَ مزنیں گہتری اتکگ۔ آئی ءَ گوشت کہ چین ءِ حکومت پاکستان ءِ گوما ھاسیں رنگ ءَ کشت ءُ کشاری ءِ پڑ ءَ دو نیمگی سیادی ءَ را گیش مھکم کنگ ءِ واستہ تیار انت۔ آئی ءَ اے گپ ءِ سر ءَ زور پر دات کہ صدر شی جن پنگ مدام ھمساھگیں ملک آنی گوما وتی سیادی ءَ را سک باز ارزشت دنت ۔ چین ءُ پاکستان ءِ اقتصادی راہداری ءِ چیر دستی ءَ چین ءَ 35.4 ارب ڈالر ءِ نزیک ءَ براہ راست سرمایہ کاری کتگ کہ اے دوئیں ملک آنی نیام ءَ مھکمیں سیادی ءِ درشان اِنت۔
