انقرہ۔31مئی (اے پی پی): مزن وزیر محمد شہباز شریف سئے شمبے ءَ سئے روچی سرکاری تر ءُ تاب ءِ ھاترا ترکی ءَ پج ات، انقرہ ائیر پورٹ ءَ پجگ ءِ پد ءَ مزن وزیر محمد شہباز شریف ءُ آئی ءِ ڈل ءَ رک وزیر ءِ دیمپانی ءُ مزن کارندہ آناں وش اتک کت۔ اے موہ ءِ سر ءَ مزن وزیر محمد شہباز شریف ءَ را گارڈ آف آنر پیش کت۔ وزیر ءِ دیمپانی خواجہ محمد آصف، وزیر ءِ اھوالکاری ءُ شنگ کاری مریم اورنگزیب ، وزیر ءِ سرمایہ کاری بورڈ چوہدری ساالک حسین، ھاسیں کمکا طارق فاطمی ءُ فہد حسین ھم مزن وزیر ءِ ھمبراہ اتنت۔ مزن وزیری ءِ سیٹ ءِ گرگ ءَ چہ پد مزن وزیر شہباز شریف ءِ ایش ترکی ءِ اولی تر ءُ تاب اِنت۔ وزیر ءِ درئی کار بلاول بھٹو زرداری ھم ترکی ءَ پج ائیت۔ تر ءُ تاب (31 مئی تاں 2 جون 2022) ءِ ساھت ءَ مزن وزیر شہباز شریف ءِ صدر رجب طیب اردوان ءَ گوں ون آن ون گند ءُ نند کنت ، ایشی ءَ پد ڈلی تک ءَ گپ ءُ تران بیت۔ پاکستان ءُ ترکی ءِ نیام ءَ دو نیمگی یکوئی آنی توامیں بن گپ آنی سر ءَ چار ءُ بچار ءَ ھوار دمگی ءُ میاں اوستمانی کار آنی سر ءَ ھیال ریچی کنگ بیت۔ دوئیں سروک دیوان ءَ چہ پد ھال رسانکی در آں گوں یکجائی گشتانک ھم دینت۔ صدر اردوان مزن وزیر ءِ شرپ ءَ شپ ءِ شام (ڈنر) ھم دنت اِنت۔ گوزوکیں سال ءَ پاکستان ءُ ترکی ءِ نیام ءَ سفارتی یکوئی آنی برجائی یکوئی آنی برجائی ءِ 75 سالروچ ھم برجم دارگ بوھگ ءَ اِنت۔ تر ءُ تاب ءِ ساھت ءَ صدر اردوان ءُ مزن وزیر شہباز شریف یکجائی رنگ ءَ یاتگیری نشان ھم جاڑی کناں ایش ترکی ءُ پاکستان ءِ نیام ءَ دو نیمگی دراج بُریں یکوئی آنی رد ءَ تیار کنگ بوتگ۔ ترکی ءِ درئی کار، تجارت ءُ جان سلامتی ءِ وزیر ھم تر ءُ تاب ءِ ساھت ءَ مزن وزیر ءَ گوں گند ءُ نند کنت اِنت۔ مزن وزیر ترکی ءِ نامداریں کاروباری شاہوکار ءُ جتا جتائیں شوبگ آں گوں سیادی داروکیں سروک آں گوں سرجم ءُ برجمیں گند ءُ نند کنت۔ ترکی ءِ کاروباری برات آنی سروک ڈل، یونین آف چیمبرز کموڈیٹی ایکسچینج، (ٹی- او- بی-بی) ءِ صدر مزن وزیر ءِ شرپ ءَ وش اتک کنت۔ مزن وزیر پاکستان تکی بزنس کونسل فورم، ھم شرکت کنت ایشی ءِ بندوبست ، ترک درئی معاشی یکوئی بورڈ، (ڈی۔ای۔آئی۔کے) ءِ شریکداری ءَ چہ کنگ بوتگ۔ مزن وزیر اے مراگش ءِ ساھت ءَ پاکستان ءَ سرمایہ کاری ءِ موہ ءَ سہرا کنت ءُ پاکستان ءَ سرمایہ کاری ءِ واستہ ترک کمپنی آنی دلبڈی ءَ ھم کنت تانکہ پاکستان ءُ ترکی ءِ نیام ءَ تجارتی ءُ معاشی رابطہ آناں مھکم جوڑ کنگ ءِ واستہ کار کنگ بہ بیت۔ نامداریں پاکستانی کاروباری سروک اے مراگش ءَ بھر زوری کن اَنت۔ اے موہ ءَ دوئیں ملک آنی کاروباری سروک آنی نیام ءَ (بی- ٹی- بی) گند ءُ نند ھم بندوبست کنگ بیت۔
