کوئٹہ۔ 31 مئی (اے پی پی) جمعیت علماء اسلام بلوچستان نا صوبائی امیر و بنجائی وزیر ہاؤسنگ اینڈ ورکس مولانا عبدالواسع بلوچستان اٹی بلدیاتی گچین کاری تیٹی جمعیت علما اسلام نا مچ آ صوبہ ٹی سرسہبی آ پارٹی عہدیدار ضلعی امیر و کارندہ غاتے مبارکبادی ترسا پارینے کہ جمعیت علماء اسلام خیبرپختونخوا غان پد بلوچستان نا بلدیاتی گچین کاری تیٹی بھلو کچ اسے آ سرسہبی دوئی کرے، نن الس نا خذمت بنجاصوبہ غان پد ضلعی کہول آ ہم برجاتخنہ۔ داخیال آتا درشانی ءِ او کوئٹہ ٹی تینا ہنکین آ پارٹی عہدیدار و کارندہ غاتون گپ وتران کرسا کرے۔ اوپارے کہ جمعیت علماء اسلام صوبہ ٹی غٹ آن بھلا سیاسی و مذہبی جماعت جوڑ مسنے ، 2018ء نا گچین کاری تیان پد 29 مئی آ مروک آ بلدیاتی گچین کاری تیٹی ہراوڑ سرسہبی دوئی کرینے اوڑآ نن تینا کارندہ و ووٹرآتے خراج تحسین پیش کینہ، جمعیت علماء اسلام الس ہراوڑ بلدیاتی گچین کاری تیٹی زیات آن زیات بشخ ہلکونو اودے نن جمہوری سرسہبی گوندنہ و جمعیت علما اسلام ہراوڑ تینادور حکومت اٹ الس نا خذمت ءِ کرینے اونا چرجوئی اینو ہم برجاءِ۔ پشین، قلعہ عبداللہ، چمن، قلعہ سیف اللہ ، زیارت ، ہرنائی ، خانوزئی، خضدار، قلات، مستونگ تون اوار ایلو علاقہ غاتیٹی ہراوڑاٹ الس بلدیاتی گچین کاری تیٹی جمعیت علماء اسلام نا اومیتدار آتے سرسہب کرفے اوڑآ نن خراج تحسین پیش کینہ۔ غٹ ضلع و تحصیل آتیٹی ہندی کہول آ جمعیت نا حکومت جوڑ مریک و غٹ تر واکداری تے شیفکو کہول آ گدریفنہ۔
