اقوام متحدہ۔ 10 مارچ (اے پی پی) پاکستان گلوبل وارمنگ ءِ محدود کننگ آ زور شاغسا پارینے کہ چاگڑدی مالی امداد آن ہمو وڑوڈول آتیان فائدہ ہرفنگ نا گرج ءِ ہرافتیان چاگڑدی رکھ انا گام گیج آتے پک کننگ تون اوار شونداری و جھیڑۃ غاتا توننگ نا نیام اٹ زیات آن زیات ہم آہنگی ودی مرے۔ اقوام متحدہ ٹی پاکستان نا آخبتی مندوب منیر اکرم ’’لیوریجنگ کلایمیٹ فنانس‘‘ نا سرحال آ اڈ ہلوک آ سلامتی کونسل نا آریافارمولادیوان اٹ تران کرسا پارے کہ ننے چاگڑدی بدلی تون مون تننگ کن ہلہلہ ئی بنداو تیا گام گیج آتے پک کننگ نا گرج ءِ اگہ داوڑ کننگتو تو موسمیاتی بدلی ڈغار، سمندر، وسیلہ و ملازمت آتے خطر ہ ٹی شاغک و شاید جھیڑہ غاتے ودفک۔ اوپارے کہ گلوبل وارمنگ ءِ 1.5 ڈگری سینٹی گریڈ محدود تخنگ و چاگڑدی بدلی نا رفتار ءِ سست کننگ کن مالی کمک نا گرج ءِ۔ اوپارے کہ دا پارسا کہ بھاز کم موافقت نا ڈٹ مربوط نقطہ نظر ءِ مون آ دیک، موافقت چاگڑدی فنانس نا مرکز بایدے مرے۔ پاکستانی مندوب منیر اکرم پارے کہ روزگار نا سوب آن ودی مروک آ جھیڑہ و جنگ آتوے توننگ بھاز المی ءِ ہراٹی دیر، آبی وسیلہ غاتا رکھ ، انتظام و باکفایت کاریم اٹ اتنگ و خاص وڑاٹ براعظم افریقہ تون اوار دے ٹک نیامی و سویلی ایشیانا گڑاس بشخ آتا کرک اٹی بدل مننگ نا عمل ءِ توننگ اوار ءِ۔
