اقوام متحدہ۔ 09 مارچ (اے پی پی) پاکستان اقوام متحدہ نا سلامتی کونسل اٹ زالبول آتا حق آ شرہ ٹی بھارت نا کوزہ گر مقبوضہ جموں کشمیر اٹی زالبول آتا حالیت زار ءِ مون آ تخا و جہانی ادارہ غا زور شاغا کہ او اوفتا مایوس کن حالیت آتے گوجالپ۔ اقوام متحدہ نا سلامتی کونسل آن تران کرسا پاکستان نا سفیر منیر اکرم مقبوضہ کشمیر اٹی بھارتی فوج انا دوتے اٹ بیدادی، ظلم وجور انا گواچی زالبول ، یوکرین اٹ برجا جھیڑہ غان زہمی زالبول و مسن تا حالیت زار و جنگ آن پد انا اوغانستان اٹی زالبول آتا حق انا رکھ انا بابت کروک آ حوالہ جات آتا کنڈآ چکار کرفسا است ہسونی نا درشانیءِ کرسا پارے کہ زالبول آتا برخلاف بیدادی نا چرجوئی برجاءِ و 15 باسکی باڈی نا شرہ غاتے ٹی مقبوضہ کشمیر آ بھاز کم چکار کننگک۔ پاکستانی مندوب جھیڑہ غاتا چندی حالیت آتے ٹی ہراڑے زالبول و مسن تے خطرہ مون تروک ءِ و اوفتا بنداوی حق انا خلاف ورزی کون آ چیلنج آتے جامع، گچین و غیر امتیازی وڑاٹ ایسر کننگ نا گرج آ زور شاغا۔ دا بابت سفیر اکرم پارے کہ کونسل نا شرہ غاتے ٹی مقبوضہ جموں و کشمیر اٹی زالبول و مسن تا برخلاف برجا بیدادی ءِ کم نظر بریک ہراڑے ہزار آ زالبول آتا برخلاف جنگ انا سلہہ نا وڑاٹ کاریم اٹ اتوک آ واقعہ کون آ عصمت دری و جنسی بیدادی نا دستاویزی شاہدی ساڑی ءِ۔ اوپارے کہ زالبول آتا داوڑنا حالیت آتے بایدے گوجالنگپ، اومستی پارے کہ نن سلامتی کونسل تون اوار اقوام متحدہ نا غٹ عمل اٹ دوآبہ نا مون ءِ تورن۔ تینا تقریر نا بناٹی سفیر اکرم زالبول آتا جہانی دے انا وخت آ مروک آ دیوان ءِ پارے کہ پاکستانی زالبول آک زند انا ہر بشخ اٹی اہم ءُ کڑد اس ادا کرینو و کرسا کیرہ۔ اوپارے کہ پاکستانی زالبول آک وزیراعظم، قومی اسمبلی نا اسپیکر، قائد حزب اختلاف، کابینہ نا وزیرآک، جج آک ، آرمی آفیسرآک، فائٹر پائلٹ نا وڑاٹ خذمت سرتسنو۔ اوپارے کہ ننا راج اٹ 20 درسد سفارتکار زالبول نمان وڑاٹ تینا خذمت ءِ سرترسا کرینو ہرافتے پاکستان تعینات کرینے۔ پاکستانی سفیر ڈبلیو پی ایس (زالبول، امن و سلامتی) نا ایجنڈا نا چار تمبہ غاتے نافذ کننگ و جھیڑہ غاتیان پد انا ترتیب آتیٹی ریلیف و بحالی نا سرجز آتیٹی زالبول آتا شریداری ءِ پک کننگ نا گرج آن ہم امنا کرے۔ اوپارے کہ جھیڑہ غاتیان زہمی ملک آتے ریاستی وتواجہی و قومی ملکیت نا پورو شرف اٹ دودوربیدگی وڑاٹ حساس فریم ورک نا تہہ ٹی تکنیکی کمک نا گرج ءِ۔
