السی ریلیف کن مالی گنجائشت تینا وسیلہ غاتیان ودی کننگ اُن، بنجائی وزیر خزانہ نا پریس کانفرنس
اسلام آباد۔ 09 مارچ (اے پی پی) بنجائی وزیرخزانہ و محصولات شوکت ترین پارینے کہ الس ءِ کبینی نا جہانی سپر سائیکل نا اثرآتیان بچفنگ کن وزیراعظم عمران خان پیٹرولیم مصنوعات و بجلی نا نہاد آتیٹی ریلیف تسنے، السی ریلیف کن مالی گنجائشت تینا وسیلہ غاتیان ودی کننگ ءِ، صنعت و آئی ٹی نا مون آدننگ کن خصوصی گام گیج کننگانے ، واپاری نسخان و افراط زر انا کچ اٹی کمتی بننگ ءِ، 5.8 ٹریلین خراج ہدف نا تعاقب اٹ 6.1 ٹریلین ریونیو یکجا کننگ نا اندازہ ءِ، تمباکو آن پد داسہ پیٹرولیم کن ٹریک اینڈ ٹریس نظام اس اتنگ انگ ءِ، ننا فصل آک جوان ہِننگ ءُ، داسال خولم اٹی 5 آن 6 درسد اسکان نا نمونا گمان ءِ، احساس پروگرام، سرسہب پاکستان پروگرام و جان جوڑی کارڈ انا کمک اٹ راج انا کم کٹیا کروک تپہ غاتا زند انا آب ءِ گچین کننگ انگءِ، اپوزیشن ءِ اقتصادی ٹک و السی آسودہی نا بارواٹ سماءِ ہنداخاطرآن او زور شاغنگ ءِ۔ چارشنبے نا دے آ داڑے پریس کانفرنس کرسا وزیر خزانہ پارے کہ سیاست نا ہنگام اٹ قومی زرگزران نا بابت اہم امور گم مسنے ہرافتے تالان کننگ المی ءِ، حکومت الس ءِ افراط زر انا جہانی سپر سائیکل آن بچفنگ کن پیٹرولیم مصنوعات و بجلی نا نہاد آتیٹی ریلیف تس، حکومت داکان مست ہم پیٹرولیم مصنوعات آتیا سیلز خراج و لیوی نا مد اٹی ماہانہ 78 ارب روپئی و بجلی نا نہاد اٹی 27.5 ارب روپئی ماہانہ نا سبسڈی تسکہ۔ پیٹرولیم مصنوعات آ سیلز خراج ءِ صفر کننگا وخت اس کہ پیٹرولیم آ لیوی ٹی ہم خاصی کمتی کننگانے۔ وزیر خزانہ پارے کہ اولیکو کوویڈ نا سوب آن سپلائی چینل اٹ اڑاند و داسہ یوکرین نا جنگ انا سوب آن جہانی کہول آ المی گڑاتا نہاد آتیٹی ودکی نا سپرسائیکل برجا ءِ و ہندا رداٹ حکومت الس ءِ ریلیف تننگ کن داخہ بھلو بھاریم اس ہرفنگ ءِ۔ وزیر خزانہ پارے کہ وزیراعظم نا پڑوکروک ریلیف پیکج نا رداٹ 700 روپئی یونٹ اسکان بجلی کاریم اٹ اتوک آ صارف آتے 5 روپئی فی یونٹ نا سبسڈی تننگک، داپیکج نا رداٹ 136 ارب روپئی نا سبسڈی فراوان کننگ انگ ءِ۔ وزیر خزانہ پارے کہ حکومت صنعت آتا مون آ دننگ کن انڈسٹریل ریلیف پیکج تس، ایمنسٹی سکیم نا بنداوی مسخت صنعت کاری ٹی ودکی ءِ، ایمنسٹی اسکیم آن فائدہ ہرفوک آ 2024 آن مست صنعت خلنگ نا پابند مریرہ، داکان مست ایمنسٹی اسکیم آن فائدہ ہرفوک آ و بینک ڈیفالٹرز بشخ ہلنگ کپسہ، ہنداوڑ ناجوڑ صنعتی یونٹ آتا بحالی ہم کننگ انگ ءِ، حکومت مسہ سال آن نسخان اٹ ہنوک آ یونٹ آتیکن آسودہی تسنے، داٹی پیشن نا زرکاری کن ہم آسراتی تننگانے۔ سمندر پار پاکستانی تے خصوصی اقتصادی زون تیٹی زرکاری آ پنچ سال انا خراج چھوٹ تننگانے۔ وزیر خزانہ پارے کہ آئی ٹی نا بشخ حکومت نا اولیت ءِ، دا بشخ پاکستان نا واپاری نسخان اٹی کمتی نا بابت اہم ءُ کڑد اس ادا کننگ کیک، داسال آئی ٹی نا بشخ اٹی 70 درسد نمو مسنے و بروک آ سال 100 درسد نمو نا گمان ءِ، ننا ہدف بروک آ منہ سال آتے ٹی برآمد آتے 50 ارب ڈالر اسکان ودفنگ ءِ، حکومت آئی ٹی آ کیپٹل گین خراج ءِ چٹفینے، فری لانسرآتے آسودہی تننگانے ، آئی ٹی ٹی زرکاری آ فارن کرنسی اکاؤنٹ ملنگ نا موکل تننگانے۔ وزیر خزانہ پارے کہ ملک انا واپاری نسخان اٹ کمتی بننگ ءِ، فروری ٹی واپاری نسخان 3.1 ارب ڈالر مس ہراکوویڈ۔ 19 آن مہالو والا کہول ءِ، تدوک آ تُو واپاری نسخان اٹی 28 درسد نا کمتی مسوسس۔ وزیرخزانہ پارے کہ وزیراعظم نا دورہ چین اٹی چار اہم سٹریٹجک امور آ گپ وتران مسنے، وزیراعظم اقتصادی زونز و خصوصی اقتصادی و ٹیکنالوجی زون تیٹی چینی زرکاری نا ہیت کرینے۔ داکان بیدس او کشت وکشار نا ویلیو چین اٹی چینی ٹیکنالوجی و مہارت نا ہیت کرے انتئے کہ ننا خواہش ءِ کہ پاکستان اٹی کشت وکشار ءِ مون آ دننگے، وزیراعظم آئی ٹی نا بشخ اٹی چینی زرکاری نا اہمیت ءِ ہم تالان کرینے انتئے کہ ننتون خصوصی ٹیکنالوجی زون تیار ءُ، داکان بیدس وزیراعظم نا دورہ ٹی پاکستان و چین نا نیام اٹ ہڑتوم آ کنڈآتا واپار آ عمومی گپ وتران مسنے۔ اسہ سوج اسے آ اوپارے کہ ایف بی آر ناکارکڑد اٹی گچینی بسنے، 5.8 ٹریلین ہدف نا تعاقب اٹی 6.1 ٹریلین ریونیو یکجا کننگ نا اندازہ ءِ، تمباکو آن پد داسہ پیٹرولیم کن ٹریک اینڈ ٹریس نظام اس اتنگ انگ ءِ۔
