اسلام آباد۔8مارچ (اے پی پی): مزن وزیر عمران خان ءَ گوشت کہ اسلام آباد ءَ گیش بوھوکیں آباتی ءُ اسلام آباد ءِ بے کساس پراھ ءُ شاھیگان بوھگ ءِ رد ءَ برز ءُ بالائیں ماڑی جوڑیشت کنگ ضلوری انت۔ کمرشل ءُ گسی منصوبگ آنی تہ ءَ ڈن ملک ءَ نندوکیں پاکستانی آنی سرمایہ کاری ءَ چہ زرامبار کٹ کنگ بیت۔ اے ھیالانی درشانی آئی ءَ سئے شمبے ءِ روچ ءَ اسلام آباد ءَ ہائی رائز (برزیں ماڑی) ءِ منصوبگ آنی ھوالگ ءَ ل چار ءُ تپاسی دیوان ءِ سروکی ءَ کنان ءَ کت۔ مزن وزیر ءَ گوشت کہ دارالحکومت ءَ گیش بوھوکیں آباتی ءُ اسلام آباد ءِ بے کساس شنگ ءُ تالان بوھگ ءِ رد ءَ برزیں ماڑی جوڑ بوھگ المی انت۔ آئی ءَ گوشت کہ حکومت ڈن ملک ءَ نندوکیں پاکستانی آنی واستہ جوانیں سرمایہ کاری ءِ موہ پیداک بوھگ ءَ انت، کمرشل ءُ گسی منصوبگ آں چہ باز زر کٹ کنگ بیت اے زر ایندگر گہبودی کار آنی سر ءَ ھرچ کنگ بوت کنت۔ آئی ءَ گوشت کہ دارلحکومت ملک ءِ پجار بنت، ھمے واستہ ا سلام آباد ءَ نوکیں زمانگ ءِ لوٹ آنی تد ءَ شہر جوڑ کنگی انت۔ مزن وزیر ءَ پنت ءُ شون کہ زمین آنی بھا ءُ سیم ءِ کار ءَ ساپ ءُسلہ ئی ءِ واستہ دل یکیمی ءَ گوں کار کنگ بہ بیت ءُ منصوبگ گیشینتگیں وھد ءُ پاس ءَ سرجم کنگ بہ بنت۔ آئی ءَ گوشت کہ اسلام آباد ءَ کرکٹ اسٹیڈیم منصوبگ ءِ سر ءَ کار ترند کنگ بہ بیت۔ دیوان ءَ را سرپد کنگ بوت کہ اسلام آباد ءَ 3 ہائی رائز ماڑی جوڑ کنگ ءِ منصوبگ بندی بوھگ ءَ انت ایشانی تہ ءَ ھواریں رنگ ءَ اپارٹمنٹس آنی کساس 14,400 بیت۔ دیوان ءَ را سر پد کنگ بوتگ کہ شہری ھاسیں رنگ ءَ ڈن ملک ءَ نندوکیں پاکستان آنی واستہ سی ڈی اے ءَ نوکیں آسراتی آنی رد ءَ ون ونڈو سنٹر ءِ جوڑ کتگ ءُ کار ءَ انت۔ اے سنٹر ءَ پراپرٹی ءِ ٹرانسفر ءُ ایندگر شہری آسراتی ءِ بابت ءَ ڈیجیٹل پورٹل ءِ جوڑ کنگ بوتگ۔ ایشی ءِ بدولت ءَ جیڈھ ءُ شکاست آناں زوتاں زوت گیواری ءَ کمک رسیت۔
