اسلام آباد۔ 08 مارچ (اے پی پی) بنجائی وزیر کانود و انصاف بیرسٹر فروغ نسیم پارینے کہ ساڑی حکومت زالبول آتا حق انا رکھ اکن المی کانود سازی کرینے و میرات اٹی بشخ اتون اوار ہروڑاٹ اوفتا حق انا رکھ ءِ کرے، دا بابت آگاہی ودی کننگ نا گرج ءِ ۔ سے شنبے نادے آ ’فاطمہ جناح یونیورسٹی ‘ ٹی جہانی یوم نسواں نا رداٹ اڈ ہلوک دود آن تران کرسا اوپارے کہ اسلام زالبول آتے غٹ آن مست اوفتا حق ءِ تس۔ داکان مست اسلام زالبول آتے زندہ درگور کننگاکہ۔ ننا حکومت نا مون آ بھاز اہم ءُ ٹاسک ئسر۔ نن سٹرکچرل بدلی و اصلاحات کرینن۔ کس اسے نا خیال اٹی الوکہ کہ داسہ میرات نا فیصلہ 15 دے اٹی مریک۔ نادرا داسہ 15 دے اٹی میراتی سرٹیفکیٹ جاری کیک۔ مہالو 8 آن 10 سال لگاکہ۔ دا بھاز بھلو بدلی اسے۔ اوپارے کہ ملک انا نیمہ آبادی زالبول آتیا تالان ءِ۔ ننا حکومت ہروڑاٹ اوفتا حق انا رکھ ءِ کرینے۔ راج اٹ دا بابت آگاہی ودی کننگ نا گرج ءِ۔ داٹی غٹ تپہ غاک تینا کڑد ءِ ادا کیر۔ اوسندھ حکومت آ زور شاغا کہ او ہم دا چرجوئی ٹی المی گام گیج کے۔ پارلیمانی سیکرٹری کانود و انصاف ملیکہ بخاری دود آن تران کرسا پارے کہ وزیراعظم عمران خان اقتدار اٹی بننگ آن مست قول کریسس کہ زالبول آتے میرات اٹی اوفتا حق ترفنہ۔ اوتینا قول ءِ پورو کرے۔ نن زالبول آتے ہمو حق آتے تننگ خوانہ ہرا قرآن مجید نا رداٹ و ننا آئین اٹ نوشتہ و جہانی کہول آ امنا کروک ءُ۔ اسلام زالبول آتے ہرا حق ءِ تس یورپ ءِ اوفتا خیال بھاز ہُرے آ بس۔ زالبول آک ہمووخت آ واکدار مریرہ ہراتم اوفتے اسہ وڑ حق دوئی مریک۔
