اسلام آباد۔ 08 مارچ (اے پی پی) چیئرمین سینیٹ محمد صادق سنجرانی پارینے کہ پاکستان ازبکستان تون تینا برادرانہ تعلقداری تے اہمیت ایتک، ہڑتوم آ ملک آتا نیام اٹ تاریخی، مذہبی و دودوربیدگی تعلقداری ءِ، پاکستان ازبکستان تون خڑکی برادرانہ تعلقداری تے بھاز قدر انا نظر اٹ ہرک۔ داخیال آتا درشانی ءِ او ازبکستان نا سفیر ایبک عارف عثمانیوف تون گپ وتران کرسا کرے ہرا سے شنبے نادے آ پارلیمنٹ ہاؤس اٹی اوڑتون اوڑدہی کرے۔ اوڑدہی ٹی تین پہ تینی است خواہی نا امور آ سرجمی اٹ گپ وتران کننگا۔ چیئرمین سینیٹ پارے کہ پاکستان ازبکستان تون تینا برادرانہ تعلقداری تے اہمیت ایتک، ہڑتوم آ ملک آتا نیام اٹ تاریخی ، مذہبی و دودوربیدگی تعلقداری ءِ۔ اوپارے کہ پاکستان ازبکستان تون خڑکی برادرانہ تعلقداری تے بھاز قدر انا نظر اٹ ہرک، ازبکستان نیامی ایشیائی ملک آتا اہم ءُ ملک اسے و پاکستان و ازبکستان نا نیام اٹ زرگزران ، دفاع، دودوربیدگ، تعلیم، واپار و سیل و سوات نا بشخ اٹی کمکاری ءِ پین مون آ دننگ نا گرج ءِ۔ اوپارے کہ زرگزرانی کمکاری نا مون آ دننگ آن ہڑتوم آ ملک آتا زرکارآتے خڑ ک بننگ نا موقع ملک،تین پہ تینی تعلقداری، واپار ، زرکاری و سیل و سوات نا مون آ دننگ کن ہڑتوم آ ملک آتا نیام اٹ پارلیمانی تعلقداری تا مون آ دننگ بھاز المی ءِ۔ اوپارے کہ پاکستان ، اوغانستان و ازبکستان نا نیام اٹ ریلوائی ڈٹ زرگزرانی شونہالی نا ضامن جوڑ مریک، دا ڈٹ آن سینٹرل ایشیانا ٹرانسپورٹ نظام ءِ پاکستان نا بندرگاہ ، گوادر، کراچی و قاسم پورٹ اتون منسلک مننگ اٹ کمک رسینگک۔ اوپارے کہ ہڑتوم آ ملک آتے کورونا دین مون تروک ءِ و گچین حکمت عملی و رکھی گام گیج آتیان دا موذی دین انا زوت مون ءِ توننگک۔ اوڑدہی ٹی ڈیہہ و جم امن و ایمنی و رکھ انا حالیت آتیا گپ وتران کننگا۔ چیئرمین سینیٹ پارے کہ پاکستان و ازبکستان مدام اسہ ایلو نا موقف نا دنیا نا ہراہم فورم آ پبی مخ تفی ءِ کرینو۔ چیئرمین سینیٹ فلسطین آ اسرائیلی ظلم و بربریت و انسانی حق انا پامالی تا مذمت ءِ کرے۔ محمد صادق سنجرانی پارے کہ کشمیر نا ویل آ ہڑتوم آ ملک آتا کمکاری خڑکی تعلقداری تا ڈیک ءِ۔ اوپارے کہ غٹ ملک آک فلسطین و کشمیر اٹی انسانی حق انا لتاڑ و ظلم و بربریت آ اسیجائی وڑاٹ توار بڑز کیر ، غٹ ملک آتا پارلیمان اسیجائی لائحہ عمل اس اختیار کیر تو دا جھیڑہ غاتاایسر اس کشنگ مریک۔ چیئرمین سینیٹ پارے کہ دا جھیڑہ غاتا ایسری کن گام گیج کننگے تانکہ دنیا ٹی امن مننگ کے۔ اوپارے کہ گوادر نئے بیرہ پاکستان بلکن دنیا نا بے شمار ملک آتیکن گیم چینجر اس مریک ، گوادر، دے ٹک نیامی، نیامی ایشیائی، یورپ و افریقی مکل آتے ملفنگ نا گونڈ ءُ کسر اسے ہراڑآن زرکاری و واپار ءِ مون آ دننگ دوئی مریک۔ اوپارے کہ پارلیمنٹرین ءِ ادارہ پارلیمانی خذمت پارلیمانی سروسز فراوان کننگ ءِ، ازبکستان نا پارلیمنٹرین ہم داڑآن فائدہ ہرفنگ کیک۔ ازبک سفیر پارے کہ ازبکستان نا پارلیمنٹ، الس و حکومت پاکستان تون برادرانہ تعلقداری تے پین مون آدننگ نا خواہندار ءُ، ہڑتوم آ ملک آتا نیام اٹ واپاری و زرکاری نا مون آ دننگ نا سخت گرج ءِ۔ اوپارے کہ ہڑتوم آ ملک آتا نیام اٹ السی و پارلیمانی رابطہ غاتا مون آ دننگ بھاز المی ءِ۔ اوپارے کہ پاکستان اٹ زرکاری کرسا ہڑتوم آ ملک آتا الس کن شونہالی اتنگک۔
