اسلام آباد۔ 07 مارچ (اے پی پی) بنجائی وزیر ریلوائی محمد اعظم خان سواتی پارینے کہ ریلوائی نا شونداری نا سفر برجاسلک، پاکستان ریلوائی نا کٹیا ٹی ودکی کینہ ، ننا پالیسی تیان بروک آ چینک ہم فائدہ ہرفرہ۔ دوشنبے نادے آ پریس کانفرنس آن تران کرسا اوپارے کہ 2023اٹی ہم تحریک انصاف نا حکومت مریک۔ ریلوائی ءِ کٹیائی ادارہ اس جوڑ کننگ کن گام گیج کننگ اُن۔ 15 تُو مست ہراتم ای وزارت ریلوائی نا منصب ءِ سنبھالاٹ ، تو پاریسٹ کہ پنشن آن بیدس ریلوائی ءِ کٹیائی ءُ ادارہ اس جوڑ کیوہ، دا چرجوئی ٹی کاریم کننگ اُن، اولیکو دے آن کوشست ئس کہ جنون نا حداسکان کنا ٹیم تفک تو نن شونداری نا سفر نا بناءِ کینہ، اوپارے کہ بزنس ہمووخت آ مریک ہراتم کارپوریٹ سیکٹر کن درگہ غاتے ملنگک، اسہ شفاف پالیسی اسے تون ہراتم نم درگہ ءِ ملرے تو ولدا گچینی بریک، نن ہرہمو کاریم ءِ کننگ اُن ہراڑآن دا قومی ادارہ ءِ کٹیائی اس جوڑ کننگ مرے۔ اوپارے کہ ریلوائی آن کرپشن نا چٹفنگ کن گام گیج کننگ اُن۔ اسہ سوج اسے نا ورندی ٹی بنجائی وزیر پارے کہ پن انا اپوزیشن بیرہ دُزی، داڑیلی و ملک ءِ بھس کننگ کن ءِ۔ عمران خان اپوزیشن نا دُز آتا کٹیا نا ذریعہ ءِ بند کرینے، اپوزیشن بے پتی اس اتے برے کل پاش آن پاش مریک۔ بنجائی وزیر ریلوائی پارے کہ پاکستان نا پلوک آ مال ءِ دا لانگ مارچ آ خڑچ کننگ ءُ۔ پاکستان ریلوائی نا وزیر وپی ٹی آئی نا کارندہ نا حیثیت اٹ چیلنج کیوہ کہ نن مقابلہ کینہ، پاکستان نا الس ءِ اپوزیشن نا غٹ کرتوت آتا علم ءِ۔ اسہ بندغ اس مسہ وار ملک انا وزیراعظم جوڑ مس و اینو او پیشن تولوک ءِ۔ اوفتا داسہ ہچ ءُ آخبت اس اف مخلوق اوفتا کرتوت ءِ چاہک۔
