اسلام آباد۔ 07 مارچ (اے پی پی) وزیراعظم نا خصوصی کمکار تخفیف نیزگاری و راجی رکھ و احساس پروگرام نا چیئرپرسن سینیٹر ڈاکٹر ثانیہ نشتر پارینے کہ احساس رعایت راشن اسکیم نا رداٹ 9.2 ملین خاہوت آتے مرحلہ وار رجسٹریشن کننگ انگ ءِ ہرافتے نت، دال و کنوئی آ تیل و سی آ ٹارگٹڈ سبسڈی فراوان کننگک، احساس پروگرام سرسہبی اٹ مسہ سال پورو کرینے، احساس راشن رعایت اسکیم نا رداٹ بنجائی و صوبائی حکومت آتا شریداری اٹ 106 ارب روپئی نا ٹارگٹڈ سبسڈی فراوان کننگک۔ داخیال آتا درشانی ءِ او دوشنبے نادے آ احساس رعایت راشن اسکیم نا بناءِ کننگ نا وخت آ تران کرسا کرے۔ اوپارے کہ احساس راشن پروگرام نا رداٹ کورونا ٹی ملک انا نیمہ نا خڑک آبادی ءِ 12 ہزار روپئی تننگا۔ حکومت کورونا ٹی دے و نن الس نا راجی آسراتی کن کاریم ءِ برجاتخا۔ احساس پروگرام نا 98 درسد بجٹ زالبول آتے ملک۔ دا پروگرام سرسہبی اٹ مسہ سال پورو کرینے۔ اوپارے کہ ملک اٹی اسہ کروڑ 80 لکھ چنا اسکول آتیان پیشن ءُ، بدین اٹ دا کچ 82 درسد ءِ۔ اوپارے کہ احساس تعلیمی وظیفہ پروگرام اسکول آتیٹی انرولمنٹ کن اہم ءُ ذریعہ سے ، داڑکن حکومت پورو ءُ نظام اس مون آ ایسونے، اسہ کروڑ چناتے دا پروگرام نا رداٹ اسکول آتیٹی داخل کینہ، 70 لکھ چناتے داتم اسکان اسکول آتیا گدریفینن۔ اوپارے کہ 40 درسد چناک سٹنٹنگ نا گواچی ءُ، وزیراعظم تینا اولیکوتران اٹی دا ویل انا پیدوار ی ءِ کریسس، حکومت احساس نشوونما سینٹر اس ملنگ ءِ، زالبول و مسن تیا خصوصی چکار کننگ انگ ءِ و پاکستان اسٹ انگا ملک ءِ ہراڑے مسن تا وظیفہ مارتیان زیاتءِ۔ اوپارے کہ احساس رعایت راشن اسکیم وزیراعظم نا خصوصی پارت آ بناکننگانے۔ بنجائی و صوبائی حکومت آتا شریداری اٹ 106 ارب روپئی آن دا پروگرام نا بناءِ کننگ انگ ءِ۔ وزیراعظم پارت کریسس کہ سبسڈی ٹارگٹڈ مرے و بیرہ ضرورت مند تپہ ءِ دانا فائدہ رسینگے۔ دامسخت کن 4 ہزار یوٹیلیٹی اسٹور آتیا ٹارگٹڈ سبسڈی فراوان کننگانے۔ 10 لکھ کریانہ اسٹور تے ہم داٹی اوار کننگ انگ ءِ۔ داوخت آ 9.2 ملین کاہوت آتا ریسہ وار رجسٹریشن کننگ انگ ءِ۔ نُت آ 22 روپئی، دال تیا 55 روپئی و کنوئی آ تیل و سی آ 105 روپئی فی کلو سبسڈی فراوان کننگانے۔ اوپارے کہ ہمسایہ ملک اٹی داوڑ ءُ نظام اس 10 سال اٹی مون آ اتنگا وخت اس کہ نن 6 تُو اٹی کاریم نا بناءِ کرینن۔ اوپارے کہ سندھ و بلوچستان نا صوبائی حکومت آتیان ہم خواست کیوہ کہ او احساس رعایت راشن اسکیم اٹ اوار مریر تانکہ ہموجاگہ ناالس ہم فائدہ ہرفنگ کے۔ ڈاکٹر ثانیہ نشتر پارے کہ تحصیل تیٹی احساس ون ونڈو سینٹر اس ملنگ انگ ءِ۔ ماڈل پناہ گاہ تا تفنگ ہم ہندا پروگرام نا بشخ اسے۔
