اسلام آباد۔ 07 مارچ (اے پی پی) بنجائی وزیر داخلہ شیخ رشید احمد پارینے کہ اپوزیشن نا کنڈآن بے پتی اپوزیشن کن بے پتی اس وخت اس کہ وزیراعظم عمران خان کن است جمی نا تحریک اس مریک، اپوزیشن والا تا مون آن لگک کہ دا باتننگ والا ءُ، بے پتی نا تحریک بے سہب مریک، وزیراعظم عمران خان غٹ تنکی تیان سرسہب مریک، زندان تیان بچوک آک زوت کانود نا دنگ اٹ مریرہ، ملک زمی جمب و نوکاپ آن آخا بلکن بے چیٹی آن بھس مریک، وزیراعظم عمران خان سامراجی واکدار تے کلہو تسنے کہ ننا دھرتی ڈرون جلہو آتیکن کاریم اٹ اتنگ پننگک، درملکی واکدارآک ملک اٹی نزوری خوارہ، ننے مارچ آن ہچ ءُ ویل اس اف۔ دوشنبے نادے آ پریس کانفرنس آن تران کرسا وزیرداخلہ پارے کہ تحریک بے پتی عمران خان کن است جمی نا تحریک اس مریک، عمران خان غٹ مشکل آتیان پیشن پیش تمک، ننے مارچ آن ہچ ءُ ویل اس اف، پیپلزپارٹی آسٹریلیا نا ٹیم اکن کسر ءِ بدل کرے ہرا ستاکڑزک، نن اوفتے گیگ بدل کسر و جاگہ اس ایتنہ، نن لانگ مارچ اٹ اڑاند ودی کپنہ، زالبول مارچ انا مسن تے ہم پاننگ خواوہ کہ بے شک او مارچ کیر ولے جاگہ نا گچینی ءِ سجفر کیر۔ اوپارے کہ ہندا تُو 22 آن 24 مارچ اسکان اسلام آباد اٹی وزراء خارجہ کانفرنس مریک ہراٹی بھلا ملک آتا وزیر خارجہ غاک بننگ ءُ، داوخت آ 22 و 23 مارچ آ ہندی چٹھی مریک، 23 مارچ آ فلائنگ مارچ و تاریخی پریڈ مریک، جے ٹین سی جہاز ہم مارچ کیک۔ وزیرداخلہ پارے کہ اپوزیشن ءِ داخہ عقل اف کہ او حالیت آتا خواست آتے پہہ مرے، ملک زمی جمب نوکاپ آن آخا بے چیٹی آن بھس مریک، درملکی واکدار آک ملک ءِ نزور کننگ نا کوشست کننگ ءُ، ننتون حوال ارے کہ درملکی واکدار آک پاکستان اٹ بدامنی تالان کننگ خوارہ ، دنیا ٹی جہانی جنگ انا خطرہ ءِ اپوزیشن انت کننگ ءِ، اوحالیت آتا خواست آتے پہہ مفننگ ءِ ، کنا جندی سلاہ ءِ کہ گپ وتران کن درگہ غاک مدام ملوک مریر۔ اوپارے کہ اپوزیشن داتاثر تننگ ءِ کہ ننا بندغ آک پورو ءُ، اپوزیشن والاک پار نم ملک ءِ ہراوڑ چلیفیرے۔ اوپارے کہ عمران خان ایکٹیو ءِ و او غٹ تنکی تیان آسانی اٹ پیش تمک، اولیکو وار ملک اٹی خارجہ پالیسی جوڑ مس، وزیراعظم عمران خان ملک اٹ سامراج نا برخلاف آجو خارجہ پالیسی نا بنداو ءِ تخانے، وزیراعظم عمران خان شاری تے جان جوڑی نا آسراتی فراوان کرے۔ اوہیلتھ کارڈ ہم مخلوق ءِ تس، ہیلتھ کارڈ انا سوب آن سرکاری ہسپتال آک خورک ءُ، جان جوڑی کارڈ انا سوب آن داسہ نیزگار بندغ فائیو اسٹار ہسپتال اٹ درمان ءِ کرفک۔ وزیرداخلہ شیخ رشید احمد پارے کہ پشاور دھماکہ ٹی اوار نیٹ ورک نا ڈس و نشان ءِ خلکونن، ننے طالبانک باور کرفینو کہ اوفتا گل زمین پین ملک اسے نا برخلاف کاریم اٹ اتنگپک۔ اوپارے کہ جہانی کہول آ پیٹرولم مصنوعات آتا نہاد آک ودنگ ءُ و پاکستان نامقابلہ ٹی ایلو ملک آتیٹی پیٹرولیم نانہاد آک زیات ءُ، وزیراعظم عمران خان ساڑی ہی ٹی پیٹرول و بجلی نا نہاد آتیٹی کمتی کرسا الس ءِ ریلیف تسنے۔ اوپارے کہ اپوزیشن نا کنڈآن بے پتی بے سہب مریک و دا بے پتی اپوزیشن کن بے پتی اس وخت اس کہ وزیراعظم کن است جمی نا تحریک اس مریک۔ اوپارے کہ اپوزیشن 10 مارچ آ دیوان نا ریکوزیشن ایتک، اوکان پد 15 دے انا تہہ ٹی دیوان ءِ بٹنگ مریک۔ شیخ رشید احمد پارے کہ اپوزیشن پاننگ ءِ ننا بندغ آک پورو ءُ، مچ آ بندغ آک تو اللہ نا ءُ، 172 مخلوق ءِ نمے اتوئی ءِ نن تو تیار اُن۔ اسہ سوج اسے نا ورندی ٹی وزیر داخلہ پارے کہ سیاست اٹ درگہ غاتے بند کننگ مفک، اومیت ءِ کہ حالیت آک بھاز زوت سہی مریرہ، اسپیکر ووزیراعظم نا برخلاف اپوزیشن بے پتی کن ہراکوشست آتے کننگ ءِ ، اوٹی او بے سہب مریک، وزیراعظم عمران خان غٹ صوبہ غاتا زمزیر ءِ۔
