وزیراعظم عمران خان نا احساس رعایت راشن اسکیم نا بناءِ کننگ نا دود آن تران
اسلام آباد۔ 07 مارچ (اے پی پی) وزیراعظم عمران خان پارینے کہ کبینی نا ریسہ پاکستان اٹی آخا مچ آ دنیا ٹی ءِ، پاکستان داوخت آ ہم اڑزآن انگا ملک ءِ، کبینی نا مون ءِ توننگ کن بھاز بھلو سبسڈی اس تننگ اُن، خراج وصولی ودا تو پیٹرول، ڈیزل و بجلی ءِ اڑزآن کرین، 2 کروڑ خاہوت احساس رعایت راشن اسکیم آن فائدہ ہرفرہ، رجسٹرڈ بندغ آتے نُت، سی و دال 30 درسد اڑزآن ملک، مسن تے تعلیم تننگ آن بیدس ملک شون ہلنگ کپک، ہندا تُو انا ایسر اسکان سندھ آن بیدس ہر صوبہ ٹی ہیلتھ انشورنس نا آسراتی ملک، نزور تپہ ءِ شونداری نا عمل اٹ اوار کننگ ریاست نا زمواری ءِ۔ اوداخیال آتا درشانی ءِ دوشنبےنادے آ داڑے احساس رعایت راشن اسکیم نا بناءِ کننگ نا دود آن تران کرسا کرے۔ وزیراعظم پارے کہ انسانیت نا دڑد تخوک آ بندغ آسودہی ءُ کاریم کننگ کیک، انسانیت نا خذمت ءِ کننگ اللہ تعالیٰ ءِ بھاز وڑک، ساڑی حکومت ملک انا تاریخ نا بھاز بھلو احساس پروگرام نا بناءِ کرینے ہر امدینہ نا ریاست نا روڈمیپ نا بشخ اسے، ریاست نا زمواری ءِ کہ ہر اتپہ شونداری ٹی پدی سلیسنے اودے شونداری نا عمل اٹ اوار کننگے، مدینہ نا ریاست اٹ غٹ آن مست ہندا کاریم ءِ کننگاسس و بیت المال آن نیزگار آتا کمک ءِ کننگاکہ، مدینہ نا ریاست نا بنداو کانود نا بالادستی، شیفکو تپہ ءِ بڑزا ہرفنگ ومافیا تے کانود نا تابع کننگ آ تخنگاسس۔ وزیراعظم پارے کہ کورونا غان دنیا ٹی بھاز بھسکاری مس، لاک ڈاؤن نا سوب آن کاروبار بند مس، امریکہ کون آ شون ہلوک ملک اٹی ہم نیزگارآتے بھاز مشکل آتون مون تروئی تما، دیہاڑی دار مزور آتا کٹیا بند مسوسس، ہمووخت آ نن احساس پروگرام نا رداٹ حقدار خاہوت آتا مالی کمک ءِ کرین، جہانی بینک ہم احساس پروگرام ءِ دنیا ٹی مسہ چار بھلا پروگرام تیٹی شمار کرینے، اکانومسٹ نا سروے ٹی دا پاننگاکہ پاکستان نا حکومت نئے بیرہ زرگزران ءِ سنبھالا بلکن مخلوق ءِ ہم کورونا نا اثرآتیان بچفے۔ وزیراعظم پارے کہ احساس پروگرام نا 98 درسد پیسہ زالبول آتے ملنگ ءِ، زالبول آتا حق انا داڑے بھلو ہیت کننگک، ہراتم اسکان مسن تے تعلیم تفننگک و لمہ غاتا مالی کمک ءِ کننگپک تانکہ او تینا چناتے تعلیم ترفنگ کیر، ہموتم اسکان ملک شون ہلنگ کپک، تعلیم غٹ آن زیات المی ءِ، خوانندہ لمہ ہی مچ آ خاہوت ءِ مون آ دیک۔ وزیراعظم پارے کہ اسکول آتیان ہراچناک پیشن ءُ دااسہ بھلو المیہ سے، مستین اٹ داکنڈآ چکار کننگتو، داسہ اسکول آتیٹی داخلہ کن مار و مسن تے وظیفہ تننگ انگ ءِ وخت اس کہ مسن تے تو مارتیان زیات وظیفہ ملک تانکہ او تعلیم نا کنڈآ بریر ۔ اوپارے کہ خور انا کمتی نا سوب آن چناتا سہی پرورش وافزائش مفک، داڑآ ہم کس اس مہالو چکار کتو، داسہ نن ہر ضلع ٹی دا اسکیم نا بناءِ کننگ اُن، ہندن ہندن خراج وصولی ودک فنڈ آتے ہم ودفسا کینہ، اگہ خراج وصولی ودپک تو پیٹرول و ڈیزل 10 روپئی و بجلی 5 روپئی اڑزآن تننگ کتونہ، ننا پورو کوشست ءِ کہ خراج وصولی ٹی ودکی مرے تو نزور تپہ غا پین زیات خڑچ کین، لمہ و چناءِ پورو خور بایدے ملے تانکہ او جان جوڑ مریر۔ وزیراعظم پارے کہ احساس راشن پروگرام نا مسخت دادے کہ نیزگاری نا اثرآتیان مخلوق ءِ رکھ تخنگ مرے، بیرہ پاکستان اٹی ہی آخا مچ آ دنیا ٹی کبینی نا ریسہ ءِ، پاکستان داوخت آ اڑزآن انگا ملک ءِ، متحدہ عرب امارات و دبئی ہراکان تیل پیش تمک اونا نسبت ہم نن اڑزآن ڈیزل و پیٹرول تننگ اُن، پاکستان اٹ ڈیزل و پیٹرول نا نہاد برصغیر اٹی غٹ آن کم ءِ، ڈیزل و پٹرول نا نہاد آتا ودنگ آن ٹرانسپورٹ نا کِراودک و ہنداڑآن کبینی مریک ، ساڑی حکومت کبینی نا مون ءِ توننگ کن بھاز بھلو سبسڈی اس تننگ ءِ ، 2 کروڑ خاہوت احساس راشن اسکیم آن فائدہ ہرفرہ، رجسٹرڈ بندغ آتے کریانہ اسٹورز و یوٹیلیٹی اسٹور آتیان نت، سی و دال 30 درسد اڑزآن ملک و داڑآن کبینی نا بھاریم کم مریک۔ وزیراعظم پارے کہ ہیلتھ کارڈ ہم اسہ بھاز بھلو ڈٹ اسے، سندھ آن بیدس ہر صوبہ ٹی ہندا تُو انا ایسر اسکان ہر خاہوت ءِ 10 لکھ روپئی نا انشورنس ملک و نیزگار خاہوت پرائیویٹ ہسپتال آتون اوار ہرہسپتال آن درمان کرفنگ کیک، اسہ نجی ہسپتال اسے ٹی ہیلتھ کارڈ آ ہارٹ ٹرانسپلانٹ ہم کننگانے، ہزگار ملک آتیٹی ہم دا آسراتی دوئی اف و ہندا گام مدینہ نا وڑآ آسودہی ریاست نا ءِ، مچ آ دنیا ٹی آسودہی ریاست نا تصور مدینہ نا ریاست آن ہلنگانے ولے بدبختی اٹ بھاز کم مسلمان ملک داوڑنا فلاحی ریاست کن کوشست کننگ ءُ۔ وزیراعظم احساس پروگرام نا رداٹ حقدار خاہوت آتا مالی کمکاری آ ڈاکٹر ثانیہ نشتر و اونا ٹیم ءِ خراج تحسین پیش کرے۔
