اسلام آباد۔4مارچ (اے پی پی):صدر مملکت ڈاکٹر عارف علوی ءَ گوں ازبکستان ءِ صدر شوکت مرزایوف ءَ آدینگ ءِ روچ ءَ گند ءُ نند کت۔ گند ءُ نند ءَ وت مہ وتی واھگی کار ءُ میاں اوستمانی کار آنی ھوالگ ءَ ھیال ریچی کنگ بوت۔ صدر ءِ مملکت ءَ دو نیمگی روگ ءُ آیگ ءِ ھوالگ ءَ دل یکیمی ءِ درشان کت ءُ سیاسی ، تجارتی ، اقتصادی ، دیمپانی ، سیکورٹی، رابطہ ، وانگ ءُ زانگ ءُ دود ءُ ربیدگی روگ ءُ آیگ ءَ ھوار توامیں شوبگ آنی تہ ءَ کمک آناں دیمروئی دیگ ءِ واھشت ءِ درشان کت۔ آئی ءَ “وژن سنٹرل ایشیا” پالیشی ءِ فریم ورک ءِ توک ءَ نیامی ایشائی ءِ گوما رابطہ آناں گیش کنگ ءِ واستہ پاکستان ءِ کوشست آنی درشان کت۔ صدر عارفعلوی ءَ پاکستان ءِ دکہ آنی وسیلگ ءَ ازبکستان ءُ ایندگر نیامی ایشیائی ملک آنی گوما دمگی ھوارئی ءُ رابطہ ءِ امیت آناں سہرا کت۔ آئی ءَ گوشت کہ ٹرانس اوگان ریلوے انچیں یک منصوبگ بیت ایشی ءَ چہ زمینی رابطہ مھکم بنت۔ آئی ءَ سیل ءُ سواد ءَ را دیمروئی دیگ ءُ الس رابطہ آنی واستہ بالی رابطہ آنی ارزشت ءِ سر ءَ زور پر دات۔ دوئیں صدر آں ورنا آنی نیام ءَ کمک آناں گیش ودینگ ءُ دوئیں ملک آنی نیام ءَ سائنس ءُ ٹیکنالوجی ءِ شوبگ ءَ رابطہ آناں دیمروئی دیگ ءِ سر ءَ تپاک کت۔ صدر عارف علوی ءَ پاکستان ءُ ازبکستان ءِ نیام ءَ اسٹریٹیجک پارٹنر شپ ءِ آیوکیں گامگیج آنی سر ءَ یکجائی جار ءُ جتا جتائیں شوبگ آنی تہ ءَ وتی مہ وتی یاتگریں / منوگری آناں ساڑت۔ آئی ءَ گوشت کہ اولسرئی بنیات ءَ تجارتی منوگری (PTA) ءِ سر ءَ دست چنگل ءَ چہ دوئیں تجارت آناں ودینگ ءِنوکیں کشک پچ بیت۔ دوئیں سروک آں وانگ ءُ زانگ، دود ءُ ربیدگ، دلامتی ءُ دیمپانی ءُ کمک آنی دیمروئی ءُ ھمک تک ءَ اقتصادی دیمروئی ءِ یکجائی سیم سر آنی در جنگ ءِ جزم ءِ درشان کت۔ دوئیں صدر آں وت مہ وتی واھگی کار آنی ارزشتی ایں دمگی ءُ میاں اوستمانی کار آنی سر ءَ ھیال ریچی کت۔ اے موہ ءِ سر ءَ صدر مملکت ءَ ازبک صدر ءَ را بھارتی گیر کانودی آوار جتگیں مقبوضہ جموں کشمیر ءِ جاور ھال آنی بابت ءَ سرپد کت۔
