اسلام آباد۔ 04 مارچ (اے پی پی) وزیراعظم عمران خان پارینے کہ راوی اربن ڈویلپمنٹ اتھارٹی و سینٹرل بزنس ڈسٹرکٹ والٹن لاہور نا چاگڑدی توازن و گچینی کن بھاز اہمیت تخوک ءُ ڈٹ ءُ۔ داخیال آتا درشانی ءِ او جمعہ نادے آ راوی اربن ڈویلپمنٹ اتھارٹی و سینٹرل بزنس ڈسٹرکٹ والٹن لاہور نا ڈٹ آتیا پیش رفت نا جاچ ءِ ہلنگ کن اڈ ہلوک آ دیوان نا کماشی ءِ کرسا کرے۔ وزیراعظم پارے کہ ملک انا تاریخ اٹ اولیکو وار دا ڈٹ آتا کمک اٹ وسیلہ غاتے سہی وڑاٹ کاریم اٹ اتنگ انگ ءِ۔ داڈٹ آک دارداٹ بے مٹ مریرہ کہ اوفتا کمک اٹ بھلو کچ اسے آ زرکاری بریک۔ داکان مست راوی اربن ڈویلپمنٹ اتھارٹی نا چیف ایگزیکٹیو آفیسر عمران امین وزیراعظم ءِ ڈٹ آ پیش رفت آن معلومدار کرسا پارے کہ چندی ڈٹ ہرافتے ٹی چہارباغ، انڈسٹریل اسٹیٹ، واٹرٹریننگ ورک، سفائربے ، ویسٹ ٹریٹمنٹ پلان تون اوار چندی ڈٹ آتیا کاریم ترندی اٹ برجاءِ و غٹ انتظامی و چاگڑدی ویل آتے ایسر کننگانے و کاریم ترندی اٹ مون آ ہِننگءِ ۔ وزیراعظم ءِ باب پاکستان نا تفنگ نا بارواٹ ہم معلومدار کننگا ہراٹی 1900 آن داتم اسکان والٹن نا تاریخ ءِ عجائب گھر اٹی رکھ کننگک۔ داکان بیدس ایل این جی پاور پلانٹ ہم خلنگک و سینٹرل بزنس ڈسٹرکٹ اٹ اسہ پوسکن ءُ ٹیچنگ ہسپتال اس ہم تفنگک ۔ وزیراعظم ءِ پاننگاکہ والٹن نا ڈٹ آہم کاریم ترندی اٹ برجاءِ و بروک آ سال مارچ اسکان پورو مننگ نا گمان ءِ۔ وزیراعظم ءِ راولپنڈی ٹی نالہ لئی و رنگ روڈ ڈٹ آتیا پیش رفت نا بارواٹ ہم معلومدار کننگا۔ وزیراعظم پارے کہ دا غٹ ڈٹ آک ملک انا قومی فائدہ غاتیکن بھاز اہم ءُ۔ او تعلقدار کمامدارآتے پارت کرے کہ دا ڈٹ آتا ترندی اٹ پوروی کن دقیقہ فروگزاشت کننگپ۔ دیوان اٹی وزیر مملکت حوالکاری فرخ حبیب، وزیراعظم نا خصوصی کمکار ڈاکٹر شہباز گل ، وزیراعلیٰ پنجاب سردار عثمان بزدار ، چیئرمین نیا پاکستان ہاؤسنگ اینڈ ڈویلپمنٹ اتھارٹی لیفٹیننٹ جنرل (ر) انور علی حیدر، راوی اربن ڈویلپمنٹ اتھارٹی نا سی ای او عمران امین و تعلقدار سینئر کمامدارآک ساڑی ئسر وخت اس کہ ہندی حکومت آتا صوبائی وزیر محمود الرشید، وزیراعلیٰ پنجاب نا سلاہکار ڈاکٹر سلمان شاہ، پنجاب حکومت نا ترجمان حسان خاور و پنجاب نا تعلقدار کمامدارآک ویڈیو لنک انا کمک اٹ بشخ ہلکر۔
