اسلام آباد۔ 04 مارچ (اے پی پی) وزیراعظم عمران خان پارینے کہ حکومت ملکی زرگزران نا شونداری کن زیات استعداد والا بشخ آتے آسودہی فراوان کننگ ءِ، صنعتی و آئی ٹی بشخ آتا شونداری کن حکومت تاریخی ءُ پیکج اس تس، حکومت ملکی نظام اٹ کاروباری سرجزآتیکن آسراتی تے ودفنگ کن بھلو کچ اسے آ اصلاحات درستی راستی کرفینے۔ داخیال آتا درشانی ءِ او جمعہ نادے آ تینا کماشی ٹی اولیتی بشخ آتا رداٹ آئی ٹی نا بشخ اٹی تروک آ آسودہی تیا دیوان آن تران کرسا کرے۔ وزیراعظم پارے کہ لائخ ورناک فری لانسرز ءِ آسراتی تا فراوانی آن زرمبادلہ ٹی ودکی ممکن مریک، ملکی آئی ٹی برآمد آتیٹی ودکی حکومت نا اولیت آتیٹی اوار ءِ۔ دیوان ءِ آئی ٹی سٹارٹ اپس، صنعتی بشخ و ساڑی آ آئی ٹی کمپنی تیکن ساڑی حکومت نا تروک آ آسراتی تا نفاذ آ سرجمی آن معلومدار کننگا۔ دیوان ءِ پاننگاکہ وزیراعظم نا ساڑی ہی ٹی تروک آ انڈسٹریل و آئی ٹی بشخ انا پیکج آ عملدرآمد ترندی اٹ برجاءِ ، ملک اٹی فری لانسرز نا کچ اٹی حکومتی گام گیج آتا سوب آن خاطر خواہ ودکی مون آ بسنے ، ساڑی آ پڑوکروک آسراتی تا سوب آن داٹی پین ودکی مریک۔ فری لانسر آتا ون سٹیپ رجسٹریشن پاکستان سافٹ ویئر ایکسپورٹ بورڈ پورٹل آن پک کننگانے ہرانا فیڈرل بورڈ آف ریونیو آن رجسٹریشن خودکار مریک ۔ داکان بیدس فری لانسنگ نا کمک اٹ پیشن نا ملک آن دوئی کروک زرآتا پاکستان اٹ آسانی اٹ فراوانی کن بینکنگ چینل آتسکان رسینگ کن سٹیٹ بینک اولیتی بنداو تیا گام گیج آتے پک کننگ ءِ۔ داکان بیدس آئی ٹی کمپنی تے حکومت نا کنڈآن تروک آ خراج آ اِلنگ آن فائدہ دوئی کننگ کن ہم نظام ءِ زوت فعال کننگک۔ داکان بیدس کمرشل بینک آتا کمک اٹ منظور مروک آسراتی و آسودہی تا پک فراوانی کن ہم باقاعدہ راہشونی زوت فراوان کننگک۔ وزیراعظم حکومت نا کنڈآن پڑوکروک آسراتی و آسودہی تا فری لانسرز و آئی ٹی کمپنی و صنعت آتے فراوانی ءِ پک کننگ کن گام گیج آتیا معینہ مد اٹی عملدرآمد نا پارت جاری کرے۔ دیوان اٹی بنجائی وزیر اسد عمر، حماد اظہر ، چیئرمین اسپیشل ٹیکنالوجی زونز اتھارٹی عامر ہاشمی و تعلقدار بڑزکو کمامدارآک بشخ ہلکر وخت اس کہ گورنر اسٹیٹ بینک رضاباقر ویڈیو لنک انا کمک اٹ بشخ ہلک۔
