خلیفہ غاک ہم عدالت آتیٹی پیش مسر، صدارتی استثنیٰ ءِ چٹفنگ خواوہ، صدر مملکت ڈاکٹر عارف علوی دہشت گردی تور عدالت اٹ پیش، تینا گاڈی ءِ تینٹ چلیفسا پدی روانہ مس، روٹ خلنگتو

اسلام آباد۔ 04 مارچ (اے پی پی) صدر مملکت ڈاکٹر عارف علوی پارینے کہ کنے پاکستان نا آئین استثنا ایتک ولے ای دا استثنیٰ ءِ ہلنگ خواپرہ، آئین پاکستان نا پابند اُٹ، قرآن پاک داڑآن بھلا آئین ءِ، کیس آک بھلو وخت اسسکان چلینگسا کیرہ و داٹی گواہ کزیت کیک، کاغد آک گوہنگرہ و یات داشت چٹک، ای غٹ عدلیہ آن ہم خواست کیوہ کہ فیصلہ غاک وخت آ مریر۔ جمعہ نادے آ ایوان صدر نا پریس ونگ آن جاری بیان نا رداٹ صدر مملکت ڈاکٹر عارف علوی صدارتی استثنیٰ ہلسا انسداد دہشت گردی عدالت اٹ پیش مس۔ انسداد دہشت گردی نا عدالت نا جج محمد علی وڑائچ سماعت کرے۔ صدر مملکت 2016 نا تینا برخلاف سلہہ کیس اٹ عدالت اٹ حاضر مس۔ صدر مملکت صدارتی استثنا ہلسا عدالت نا مون آ پیش مننگ نا درخواست کریسس۔ سلاہکار پارلیمانی امور ظہیرالدین بابر اعوان بطور وکیل عدالت اٹ پیش مس۔ صدر مملکت بابر اعوان تون اوار عدالت اٹ پیش مس۔ داوخت آ گپ وتران کرسا صدر مملکت پارے کہ ای پاکستان اٹ اسہ نظیر اس جوڑ کننگ خواوہ۔ ای صدارتی استثناءِ چٹفنگ خواوہ ہنداخاطرآن پیش مسٹ۔ اوپارے کہ ای خواوہ پاکستان اٹ غٹ عدالت آتا شرف ءِ کیر۔ ہراتم اسکان ہزگار و نیزگار بریبر مفسہ انصاف ملپک۔ ای غٹ عدلیہ غان ہم خواست کیوہ فیصلہ غاک وخت آ مریر۔ داڑے مقدمہ غاک نسل آتون چلینگسا کیرہ۔ صدر مملکت پارے کہ کیس آک بھلو وخت اس چلینگسا کیرہ ، داٹی گواہ کہیک، کاغد آک گوہنگرہ و یات داشت چٹک۔ ای سلامی تاریخ نا مطالعہ ءِ کننگ نا کوشست کریٹ، اخس خلیفہ بسر او عدالت آتیٹی بھاز شرفمندی اٹ پیش مسر، استثنانا گنجائشت اف، آئین پاکستان نا پابند اُٹ، قرآن پاک داڑآن بھلا آئین ءِ۔ کنے پاکستان نا آئین استثنیٰ ایتک ولے ای دا استثنا ءِ ہلنگ خواپرہ۔ 2016 ٹی کنے آ دوبہ خلنگاسس، ہندا عدالت آن ضمانت ہم ہلکوسٹ۔ صدر مملکت عارف علوی تینا گاڈی ءِ تینٹ چلیفسا عدالت آن پدی روانہ مس۔ صدر نا بننگ آن مست ہچ ءُ ودکی سیکورٹی، نفری یا روٹ اس خلنگتو۔