جنیوا ٹی پاکستان نا مندوب نا انسانی حق کونسل نا دیوان آن تران

جنیوا۔ 04 مارچ (اے پی پی) پاکستان یوکرین نا برخلاف روس انا فوجی آپریشن آن ودی مروک آ جھیڑہ ٹی تحمل و غیر متناسب گام گیج آتیان پاناد کننگ آ زور شاغانےو اسہ ہفتہ غان برجا روس یوکرین تنکی ءِ سفارتی ذریعہ اٹ ایسر کننگ اٹ بے سہبی آ ’’سخت گڑتی ‘‘ نا درشانی ءِ کرینے۔ جنیوا ٹی اقوام متحدہ دفتر اٹی پاکستان نا آخبتی نمائندہ، پاکستانی سفیر خلیل ہاشمی تدوک آ دے اقوام متحدہ نا انسانی حق کونسل نا دمدستی سیشن اٹ مندوبین آتے پارے کہ ننے روس یوکرین تنکی نا ایسری نا چرجوئی ٹی سفارتکاری و انسانی حق انا رکھ اٹ بے سہبی و جھیڑہ غاتیان ودی مروک آ انسانی اثرآتیا بھاز گڑتی ءِ۔ اونہادی انسانی جان تا زیان آ است ہسونی نا درشانی ءِ کرے و زہمی خاہوت تون یکجہتی و ٹھپی مروک آتا زوت دراخ جوڑی کن نیک است خواہی تا درشانی ءِ کرے۔ اوپارے کہ پاکستان اقوام متحدہ نا چارٹر نا بنداوی اصول، مخلوق نا حق خودارادیت، واک انا کاریم اٹ اتپننگ، ریاست آتا وتواجہی و علاقائی سالمیت و جھیڑہ غاتا اقوام متحدہ و اونا ادارہ غاتا زیر انتظام ایسر آ کاربند ءِ انتئے کہ انسانی حق و جہانی انسانی کانود نا رداٹ زمواری تا پابندی المی ءِ۔ اوپارے کہ بے چیٹی ٹی کمتی اتنگ، پین انسانی مشکل و ہمپنگ ءِ توننگ کن سفارتی ایسر المی ءِ۔ پاکستانی مندوب روس و یوکرین نا نیام اٹ ساڑی آ مذاکرات نا ستاءِ کرسا زور شاغا کہ روس یوکرین تنکی نا ایسری کن مذاکرات بایدے برجاسلے وخت اس کہ مذاکراتی عمل اٹ بے چیٹی والا علاقہ ٹی اختہ بندغ آتا رکھ و انسانی حق آ ہم بایدے گپ وتران مرے۔ اوپارے کہ نسل، قومیت و مذہب نا بنداو آ بے پرخ غٹ زہمی بندغ آتے انسانی امداد بایدے سرکننگے۔ نن انسانی ہمدردی نا بنداو آ کوشست آتے ترند کننگ و شاری تا رکھ کشنگ نا مخ تفی ءِ کینہ۔ اوپارے کہ پاکستان بے چیٹی والا علاقہ غاتے ٹی پاکستانی شاری تتون اوار غٹ بندغ آتا راجی آسراتی و رکھ آ بھاز گڑتی ءِ، ہرافتیان زیات تر بندغ آتے بے چیٹی والا علاقہ غاتیان کشنگانے و ہرا پدی سلیسنو اوفتے کشنگ انگ ءِ۔ اوپارے کہ نن یوکرین و ایلو ملک آتا کمکاری آ اوفتا منت واراُن و نن غٹ فریق آتیان خواست کینہ کہ او شاری تا کشنگ کن رکھ ءُ کسر اس فراوان کیر۔