وزیرخارجہ مخدوم شاہ محمود قریشی و یورپی کمیشن نا نائب صدر و یورپی یونین نا خارجہ امور و سلامتی پالیسی نا بڑزکو نمائندہ جوزف بوریل نا نیام اٹ ٹیل فون آ گپ وتران مس

اسلام آباد۔ 03 مارچ (اے پی پی) وزیرخارجہ مخدوم شاہ محمو دقریشی و یورپی کمیشن نا نائب صدر و یورپی یونین نا خارجہ امور و سلامتی پالیسی نا بڑزکو نمائندہ جوزف بوریل نا نیام اٹ ٹیل فون آ گپ وتران مس ۔ ترجمان دفترخارجہ نا رداٹ پنچ شنبے نادے آ یورپی کمیشن نا نائب صدر و وزیرخارجہ یوکرین نا ساڑی آ حالیت و اقوام متحدہ نا جنرل اسمبلی نا ہلہلہ ئی  دیوان نا بابت گپ وتران کرے۔ وزیرخارجہ یات دہانی کرفسا پارے کہ وزیراعظم عمران خان روس و یوکرین نا نیام اٹ ساڑی آ حالیت آتیا است ہسونی نا درشانی ءِ کریسس و اومیت ظاہر کریسس کہ سفارت کاری آن فوجی جھیڑہ ءِ توننگ مریک۔ پدتموک ملک آتیا جھیڑہ غاتا منفی اثرآتے تالان کرسا وزیراعظم عمران خان سفارتی ایسر نا اہمیت آ زور شاغسا کرینے۔ وزیرخارجہ ساڑی آواقعہ غاتیا گڑتی نا درشانی ءِ کرسا ، یورپی یونین نا بڑزکو نمائندہ ءِ پاکستان نا اصولی موقف آن معلومدار کرے و پارے کہ پاکستان گپ وتران و سفارت کاری نا کمک اٹ جھیڑہ غاتا پرامن ایسری آ یخین تخک۔ اوداہیت آ زور شاغا کہ پاکستان پدریسہ بے چیٹی ٹی کمتی، پائیدار مذاکرات و پدریسہ سفارت کاری نا گرج آ زور شاغانے۔ وزیرخارجہ تعلقدار کثیر الجہتی معاہدہ، جہانی کانود و اقوام متحدہ نا چارٹر نا اصول آتا رداٹ باندات نا ایسر نا اہمیت آ زور شاغا۔ جوزف بوریل حالیت آتیا تینا نکتہ نظر ءِ پیش کرے و جہانی امن و سلامتی اتون اوار اوار جہانی زرگزران آ دانا اثرآتے تالان کرے۔ اوسفارتی ایسر اس پٹنگ کن پدریسہ کوشست آتا اہمیت ءِ امنا کرے۔ وزیرخارجہ و یورپی یونین نا بڑزکو نمائندہ بوریل ہڑتوم آ کنڈآتا رابطہ غاتے برقرار تخنگ آ امنا کریر۔