اقوام متحدہ ۔ 03 مارچ (اے پی پی) پاکستان پارینے کہ اوغانستان اٹی اقوام متحدہ نا کمکی مشن نا پوسکن آ مینڈیٹ اوغان حکومت نا سلابت اٹ بایدے طے کننگے ہرا جنگ آن زہمی ملک انا وتواجہہی نا شرف و اوغان الس نا زند ءِ گچین کننگ و سوگوی ءِ مون آ دننگ آ بایدے مبنی مرے ۔ داہیت آن ایڑتر کہ دا حکومت جہانی برادری نا کنڈآن امنا کروک ءِ یا آخا۔ اقوام متحدہ ٹی پاکستان نا آخبتی مندوب منیر اکرم تدوک آ دے سلامتی کونسل اٹ اوغانستان اٹی اقوام متحدہ نا کمکی مشن نا مینڈیٹ نا جاچ ءِ ہلنگ آن مست خبڑدار کرے کہ کابل اٹ حقی حکومت نا متوازی انتظامی پنجر اس جوڑ کننگ نا ہر کوشست ممکنہ وڑاٹ ناقابل قبول مریک و داپت و کمکاری ءِ چٹفک ہرا داوخت آ اقوام متحدہ نا کمکی مشن (یو این اے ایم اے) و کابل کمامدارآتا نیام اٹ جوڑ ءِ۔ پاکستان نا مندوب منیر اکرم پارے کہ اقوام متحدہ نا کمکی مشن نا پوسکن آ مینڈیٹ اٹی انسانی ہمدردی و ہلہلہ ئی امداد، اوغان زرگزران نا بحالی، اوغان ادارہ غاتا لائخی تیٹی ودکی و تعمیر نو و رابطہ غاتا ڈٹ آتیٹی آسراتی فراوان کننگ آ بایدے چکار کننگے۔ جامع طرز حکمرانی ءِ مون آ دننگ کون آ سیاسی مسخت آک اوغانستان و اوغان کمامدارآتا اسٹ انگا دنگ ءِ و 6 ہمسایہ ملک آتا پلیٹ فارم ہم داعمل ءِ مون آ دننگ اٹ کمک کرینے۔ اوزور شاغا کہ چار دہائی آن پد داسہ اوغانستان اٹی پائیدار امن ءِ مون آ دننگ نا موقعءِ انتئے کہ مچ آ ملک اٹی اسہ حکومت اسے و دانا بقاءِ ہچ ءُ خطرہ اس اف۔ اوجہانی برادری آ زور شاغا کہ او ملک انا سوگوی و ڈیہہ ٹی پائیدار امن ءِ پک کننگ کن اوغانستان اٹی بھلو کچ اسے آ انسانی تنکی آن بچنگ و اوغان زرگزران ءِ بھس مننگ آن توننگ کن کاریم کے۔ اوپارے کہ اوغانستان و اونا ہمسایہ ملک آتیکن سیکورٹی بھاز اہمیت تخک۔ داوخت آ گڑاس ہندن ءُ ملک ہم ارے ہرا دہشت گردی نا مون آ دننگ و علاقائی ملک خاص وڑاٹ پاکستان نا برخلاف اوغان گل زمین ءِ کاریم اٹ اتنگ برجاتخنگ خوارہ۔ اوجہانی برادری آ زور شاغا کہ او اوغانستان اٹی داعش خراسان نا چٹفنگ و ایلو دہشت گرد ٹولی تا کنڈآن مون تروک خطرہ غاتون مون تننگ کن اوغان کمامدارآتا کوشست آتا مخ تفی و است بڈی ءِ کے۔ پاکستانی مندوب منیر اکرم پارے کہ پاکستان اوغانستان و ڈیہہ ٹی امن، سوگوی و شونہالی نا اسیجائی مسخت آتا مون آ دننگ کن اوغان کمامدار، علاقائی و است خواہی تخوک ایلو ملک آتون کاریم ءِ برجاتخک۔
