بروک آ سال اسکان کاروبار و اُراتا تفنگ کن اسہ ہزار ارب روپئی نا بے سود وام تننگک، ننتون اخس زیات پیسہ مچ مریک الس آ ہموخہ زیات خڑچ کینہ، وزیراعظم نا فیصل مسجد اٹی بے سود وام تا بناءِ کننگ نا دود آن تران

اسلام آباد۔ 02 مارچ (اے پی پی) وزیراعظم عمران خان پارینے کہ بروک آ سال اسکان 45 لکھ خاہوت آتے تینا کاروبار اس بناکننگ و اُراتا تفنگ کن اسہ ہزار ارب روپئی نا بے سود وام فراوان کننگک، اُراتا تفنگ کن بینک آک داتم اسکان 45 ارب روپئی نا وام تسنو ، مستین اٹی دانا درور ملپک، ہندا تُو انا ایسر اسکان پنجاب نا ہر خاہوت تون جان جوڑی کارڈ مریک ہرانا کمک اٹ او ہر سرکاری و نجی ہسپتال آن تینا درمان ءِ کرفنگ کیرہ، اخس زیات خراج مچ مریک حکومت الس نا راجی آسراتی آ پین خڑچ کیک، پاکستان ءِ ہمو کسر آ شاغانن ہرانا تغ ءِ علامہ اقبال خناسس۔ داخیال آتا درشانی ءِ او چارشنبے نادے آ سرسہب پاکستان پروگرام نا رداٹ فیصل مسجد اٹی بے سود وام تا بناءِ کننگ نا دود آن تران کرسا کرے۔ وزیراعظم پارے کہ پاکستان نا جوڑ کننگ نا مسخت اسہ بے مٹ ءُ اسلامی آسودہی ریاست اس جوڑ کننگ ئسک۔ نبی کرم صلی اللہ علیہ و آلہ وسلم مدینہ نا ہرا بے مٹ آ ریاست ءِ جوڑ کرے اوٹی اسٹ اس ہم کانود آن ایڑتر الوکہ و ریاست راج انا نزور تپہ غاتا زمواری ءِ ہلکوسس۔ بدبختی اٹ نن دا نظریہ غان روگردانی کرین ہرا پاکستان ءِ جوڑ کننگ نا بنداو ئسک ۔ دنیا نا چندی غیر اسلامی ملک آک ریاست مدینہ نا اصول آتے تینا کرسا شونداری و شونہالی نا کنڈآ ہنار وخت اس کہ مسلمانک اوفتے ہلسا زوال نا گواچی مسر۔ وزیراعظم پارے کہ ایف بی آر ریکارڈ خراج مچ کرینے۔ حکومت الس ءِ ریلیف تننگ کن پیٹرول و بجلی نا نہاد آتیٹی کمتی کرینن وخت اس کہ دنیا ٹی اونا نہاد آک بڑز آ ہِننگ ءُ۔ ننتون اخس زیات پیسہ مچ مریک الس آ ہموخس ہی زیات خڑچ کینہ و ریلیف ایتنہ۔ وزیراعظم پارے کہ 45 لکھ خاہوت آتے بے سود وام تا فراوانی نا بناءِ کرینن، دانا بناءِ پسماندہ علاقہ غاتیان کرین۔ خلق اٹی 3 نیم لکھ روپئی اسکان وخت اس کہ شار تیٹی 5 لکھ روپئی اسکان بے سود وام تننگک تانکہ مخلوق تینا روزگار اس کننگ نا قابل مننگ کے۔ اُرانا تفنگ کن 20 لکھ روپئی وام تننگک۔ حکومت ورناتے چندی کسب ہیل ایتک تانکہ او تینا روزگار اس کننگ نا قابل مننگ کیر۔ اوپارے کہ آئی ٹی نا بشخ اٹی بھلو وارخواہی اس ساڑی ءِ، ورناتے 6 آن 12 تُو اٹی آئی ٹی نا المی تربیت تننگ مریک۔ وزیراعظم پارے کہ بروک آ سال اسکان 45 لکھ خاہوت ءِ اسہ ہزار ارب روپءی نا وام تننگک۔ حکومت نا گام گیج آتا مسخت الس ءِ تینا نت تیا سلفنگ ءِ تانکہ مخلوق تینا روزگار اس کننگ نا قابل مننگ کے  انتئے کہ حکومت ہر اسٹ ءِ ملازمت تننگ کپک۔ وزیراعظم پارے کہ تینا اُرا نا تفنگ ہر بندغ نا تغ مریک ، بینک مہالو لس بندغ ءِ وام تتوکہ و بیرہ پیسہ والا مخلوق تینا اُرا ءِ تفنگ کریکہ۔ بھلو کچ اسے ٹی مخلوق کچہ انگا آبادی تیٹی رہینگک۔ کراچی ٹی 40 درسد مخلوق کچہ آبادی تا ہنکینی ءُ۔ حکومت گام گیج آتا سوب بینک انا تنخواہ دار تپہ غاتے اُرا اس جوڑ کننگ کن وام تننگ اُن۔ 55 ارب روپئی نا وام داتم اسکان فراوان کننگانے۔ مستین اٹ دانا درور ملیپک۔ حکومت اُرا نا تفنگ کن وام تیا سبسڈی تننگ ءِ تانکہ لس بندغ آ کم بھاریم تمے۔ وزیراعظم پارے کہ پنجاب اٹی ہندا تُو انا ایسر اسکان ہر خاہوت تون ہیلتھ کارڈ مریک ہرانا کمک اٹ او ہرسرکاری و پرائیویٹ ہسپتال آن تینا درمان ءِ کرفنگ کیرہ۔ مہالو عام مخلوق بیرہ سرکاری ہسپتال آتیٹی درمان کرفنگ کریکہ انتئے کہ اوفتے تون درمان کن پیسہ متوکہ۔ ہیلتھ کارڈ انا سوب آن پسماندہ و خلقی آ علقہ غاتیٹی ہم نجی ہسپتال جوڑ مریک انتئے کہ ہموڑے ہم مخلوق تون جان جوڑی کارڈ انا کمک اٹ 10 لکھ روپئی اسکان مفت درمان نا آسراتی مریک ۔ وزیراعظم پارے کہ کنے تینا حکومت نا دا پروگرام آ غٹ آن زیات خوشی ءِ۔ پاکستان ءِ ہمو کسر آ شاغانن ہرانا تغ ءِ علامہ اقبال خناسس۔ داکان مست وزیراعظم عمران خان سرسہب پروگرام نا رداٹ بے سود وام دوئی کروک آ شاری تیٹی چیک بشخا۔ دود آن تران کرسا اخوت فاؤنڈیشن نا چیئرمین ڈاکٹر امجد ثاقب پارے کہ اینو نادے اسہ پوسکن ءُ سہب اسے نا اومیت ءِ ایسونے بسنے۔ اخوت فاؤنڈیشن 22 سال آن بے سود وام تننگ  ءِ۔ اوپارے کہ سرسہب پاکستان پروگرام نا رداٹ بے سود وام تننگک۔ ننا کوشست ءِ کہ لس بندغ ءِ روزگار ملے۔ اوپارے کہ ریاست مدینہ اسہ استعارہ سے ہرانا اسہ ہندن ءُ راج اسے نا ٹہیفنگ مراد ءِ ہراٹی راجی و زرگزرانی انصاف مرے۔ سرسہب پاکستان پروگرام مواخات مدینہ نا وڑآ کاریم کننگ ءِ و وزیراعظم نا وژن نا ڈیک ءِ۔