تاریخ اٹ اولیکو وار نیزگار بندغ ءِ ریلیف رسینگانے، وزیراعظم عمران خان تاریخی ءُ ریلیف اس ترسا الس نا است ءِ کٹا، شیخ رشید احمد

اسلام آباد۔ 02 مارچ (اے پی پی) بنجائی وزیر داخلہ شیخ رشید احمد پارینے کہ تاریخ اٹ اولیکو وار نیزگار بندغ ءِ ریلیف ملا، پاکستان عمران خان نا کماشی ٹی بے کنڈہلوک خارجہ پالیسی آ عمل کننگ ءِ، وزیراعظم عمران خان تاریخی ءُ ریلیف پیکج اس ترسا الس نا است ءِ کٹا، شاری دفاع نا اہمیت مسلمہ ءِ، ہروڑنا قدرتی آفت آتا وخت آ سول ڈیفنس کمکی کاریم تیٹی مدام پیش پیش مسنے ، ساڑی آ دور اٹی شاری دفاع نا فائدہ غاک مہالو آن بھاز زیات ودانو، محکمہ سول ڈیفنس نا زموارانہ شاندار خذمت آتیا خراج تحسین نا حقدار ءِ، سول ڈیفنس اٹی داسہ جدت اتنگ و اودے پوسکن آ ساڑی آ خواست آتون ہم گرنچ کننگ نا گرج ءِ۔ بنجائی وزیر داخلہ داخیال آتا درشانی ءِ چارشنبےنادے آ شاری دفاع نا جہانی دے انا بابت محکمہ سول ڈیفنس اسلام آباد نا کنڈآن نیشنل انسٹی ٹیوٹ آف فائر ٹیکنالوجی ٹی اڈ ہلوک دود آن تران کرسا کرے۔ بنجائی وزیر داخلہ شیخ رشید احمد پارے کہ سول ڈیفنس ءِ مبارکبادی ایتیوہ، 8 اکتوبر آ سول ڈیفنس گچین خذمت سرایتک، اوجری کیمپ و 65 نا جنگ اٹی سول ڈیفنس نا کڑد سفت نا قابل ءِ، سول ڈیفنس اٹی داسہ جدت اتنگ نا گرج ءِ، محکمہ سول ڈیفنس کالجز، اسکولز و یونیورسٹی تیٹی طالب علم آتے ٹریننگ نا فراوانی کن خصوصی سیشن بایدے اڈ ایتے و ہنداوڑ نا ہیلکاری سیشنک بایدے ہرچار آ صوبہ غاتیٹی مریر۔ وزیرداخلہ پارے کہ آفت پاپک بریک قوم ءِ تیارمروئی تمک و پاکستانیک اسہ عظیم ءُ قوم اسے ءُ ۔ اوپارے کہ دا چرجوئی ٹی این جی اوتے ہم ٹریننگ تننگے و پیشن نا ملک آ ہنسا ٹریننگ ہلنگے، سول ڈیفنس نا کارندہ غاتیکن فارن ٹریننگ نا بست وبند کننگے۔ وزیر داخلہ پارے کہ نیوزی لینڈ نا وڑانا آسٹریلین ٹیم ءِ ہم جعلی میلز آتا کمک اٹ دھڑ کو تننگا ہرادے ننا ادارہ غاک بے سہب کریر۔ اول سائبر اٹیک ، ڈرونز ٹیکنالوجی نا بنتویسن ولے داسہ دنیا بدل مسنے، لانگ مارچ انا بابت شیخ رشید احمد پارے کہ دا تینا لانگ مارچ ءِ ، بلاول نا مارچ تینا مارچ ءِ، 23 مارچ انا بابت لانگ مارچ ءِ ہرینہ، 23 مارچ آ دفاعی سرجزمریک۔ وزیر داخلہ پارے کہ راولپنڈی ٹی مسہ ویمن یونیورسٹی جوڑ کرین ہراکہ اسہ اعزاز اسے و دا پاکستان اٹ اسہ جاگہ اس ہم نظر بفک، تعلیمی بابت راولپنڈی شار ءِ 37 می نمبر آن اولیکو نمبر آ اتنگ نا اعزاز ہم دوئی کرینن، قوم انا مسڑ خوانوک مریک تو بروک آ چین تا گچین تربیت مننگ کیک۔