سرسہب پاکستان پروگرام ریاست مدینہ نا تغ انا پوروی نا اسہ کڑی اسے، بنجائی وزیر خزانہ شوکت ترین نا ویڈیو کلہو

اسلام آباد۔ 02 مارچ (اے پی پی) بنجائی وزیر خزانہ و محصولات شوکت ترین پارینے کہ پاکستان ءِ ریاست مدینہ نا وڑآ اسلامی آسودہی ریاست اس جوڑ کننگ وزیراعظم عمران خان نا تغ ءِ و سرسہب پاکستان پروگرام ہندا تغ انا پوروی نا اسہ کڑی اسے۔ چارشنبے نادے آ سرسہب پاکستان پروگرام نا رداٹ بے سود وام تا بنانا دود انا وخت آ تینا ویڈیو کلہو اٹی وزیر خزانہ پارے کہ پاکستان ءِ ریاست مدینہ نا وڑآ اسلامی آسودہی ریاست اس جوڑ کننگ وزیراعظم عمران خان نا تغ ءِ، اسلامی آسودہی ریاست نا جوڑ کننگ اِرا بنداوی اصول آتیا استوار مننگ کیک ہراٹی اسٹ شاری تا آسودہی و ایلو انصاف نا حکمرانی ءِ۔ وزیر خزانہ پارے کہ ریاست مدینہ نا وڑآ راج انا زرگزرانی وڑاٹ نزور تپہ غاتے بڑز ہرفنگ کن سرسہب پاکستان پروگرام نا بناءِ کننگانے۔ سرسہب پاکستان پروگرام نا رداٹ کشارگرآتے بے سود وام فراوان کننگک۔ داکان بیدس کشارگرآتے کشاری مداخل کن ہم آسان وام فراوان کننگک۔ اوپارے کہ پروگرام نا رداٹ ورناتے روزگار وخت اس کہ شاری علاقہ غاتیٹی کم کٹیا والا اُراتے 5 لکھ روپئی اسکان نا بے سود وام تننگے۔ وزیر خزانہ پارے کہ اڑزآن اُراتا تفنگ کن ہم وام تننگ انگ ءِ ہرا بے سود ءُ۔ وزیر خزانہ پارے کہ سرسہب پاکستان پروگرام نا رداٹ حکومت مچھی تننگ آخا بلکن مچھی ہلنگ نا وڑوڈول ءِ ہیل تننگ ءِ ہراڑآن ملک اٹی نیزگاری نا کچ ءِ کم کننگ اٹ کمک رسینگک۔ داوزیراعظم عمران خان نا اسہ بھلو گام اسے ۔ سرسہب پاکستان پروگرام بناکرینے و داسہ دا پروگرام نا دنگ ءِ مچ آ ملک اسکان تالان کننگک۔