جہانی بینک انا اوغانستان کن اسہ ارب ڈالر امداد نا پڑو

واشنگٹن۔ 02 مارچ (اے پی پی) جہانی بینک اوغانستان کن اسہ ارب ڈالر امداد نا پڑو کرینے۔ فرانسیسی خبررساں ادارہ نا رداٹ جہانی بینک تدوک آ دے جاری بیان اٹی پارے کہ دا امداد اوغانستان اٹی اقوام متحدہ نا ادارہ و جہانی آسودہی تنظیم تے تننگک ہرا انسانی ہمدردی نا بنداو آ کمکی کاریم تیا خڑچ کننگک۔بینک پارے کہ دا زر اوغان حکومت نا کنٹرول آن پیشن مریک۔ جہانی بینک پارے کہ دا فنڈ، گرانٹ آتا دروشم اٹ فراوان کننگک و دا امداد نا مسخت المی بنداوی آسراتی تا فراوانی ٹی کمک، ضرورت مند اوغان شاری تا رکھ، انسانی سرمایہ و اہم اقتصادی و راجی خذمت آتا رکھ اٹی مدد و آخبت اٹ انسانی امداد نا گرج ءِ کم کننگ ءِ۔ یات سلے کہ جہانی بینک انا کنڈآن 2002 اٹی اوغان شاری تے اسہ مربوط مالیاتی وڑوڈول فراوان کننگ کن اوغانستان ری کنسٹرکشن ٹرسٹ فنڈ(اے آر ٹی ایف) جوڑ کننگاسس ہراسخت یخ انا تُو تیٹی انسانی ہمدردی نا بنداو آ کمک کن تدوک آ سال دسمبر اٹی 280 ملین ڈالر خڑچ کریسس۔ ورلڈ بینک تدوک آ سال طالبان تا اقتدار اٹی بننگ آن پد اوغانستان کن امداد ءِ بند کریسس۔ اے آرٹی ایف اسہ کثیر ڈونر فنڈ اسے ہرا جہانی بینک ڈونر پارٹنرآتا کنڈآن 2002 اٹی جوڑ کریسس ہرانا رداٹ لکھ آ اوغان شاری تا زند ءِ گچین کننگ کن جہانی امداد ءِ مربوط کننگا۔ طالبان نا اقتدار اٹی بننگ آن مست اے آر ٹی ایف اوغانستان کن غٹ آن بھلا شونداری فنڈنگ نا ذریعہ ئسک ہرا حکومت نا بجٹ اٹی 30 درسد اسکان مالی کمک فراوان کریکہ۔ جہانی بینک طالبان نا دا حکومت ءِ براہ راست کمکی زر فراوان کننگ کپک ہرادے داتم اسکان جہانی برادری امنا کتوبلکن اوغانستان اٹی انسانی تنکی آن بچنگ کن اقوام متحدہ نا ادارہ کون آ اقوام متحدہ نا ادارہ اطفال یونیسیف ءِ فراوان کیک۔