آئی ٹی نا بشخ اٹی 2030 اسکان 80 کروڑ گریجویٹ آتا گرج مریک، صدر مملکت ڈاکٹر عارف علوی

اسلام آباد  ۔ 28 فروری (اے پی پی) صدر مملکت ڈاکٹر عارف علوی یونیورسٹی تیا زور شاغانے کہ او ملک اٹی گریجویٹ آتیٹی ودکی و آن لائن تعلیم نا مون آ دننگ کن تینا تعلیمی نظام اٹ ودکی و وارخواہی تیٹی ودکی کیر، دنیا نا ودوک آ گرج آتیا پورو سلنگ کن بڑزکو تعلیمی نظام اٹی آن لائن تعلیم آ چکار تننگ نا گرج ءِ۔ داخیال آتا درشانی ءِ او دوشنبے نادے آ سرحد یونیورسٹی آف سائنس اینڈ انفارمیشن ٹیکنالوجی پشاور نا 14 می کانووکیشن آن تران کرسا کرے۔ صدر مملکت پارے کہ 2030 اسکان انفارمیشن ٹیکنالوجی نا بشخ اٹی 80 کروڑ گریجویٹ آتا گرج مریک۔ پاکستان کن غٹ ءِ تعلیم نا فراوانی، شونداری کن بھاز اہمیت تخک۔ آن لائن تعلیم دامسخت ءِ ترندی اٹ دوئی کننگ نا اسٹ انگا ذریعہ ءِ۔ اومصنوعی ذہانت و کمپوٹنگ نا صدارتی گام ءِ اہم گام اس گوندا ہراکہ ٹیکنالوجی ءِ تینا کرسا ملک اٹ تعلیم، پٹ وپول و کاروباری نظام کن انقلابی ثابت مننگ کیک۔ اوپارے کہ پاکستان اٹ ورناتا بھلو کچ اسے ہرا ملک اکن شونداری نا بھلو ذریعہ اس جوڑ مننگ کیک۔ گریجویٹ آک آب اٹ تعلیم و پوسکن آ مہارت آتا تعلیم بایدے دوئی کیر۔ اوپارے کہ دنیا انسانی وسیلہ غاتا رداٹ پاکستان نا کنڈآ ہُننگ ءِ۔ اوجہانی مارکیٹ اٹ ودوک آ گرج آتا رداٹ داوارخواہی تیان فائدہ ہرفنگ آ زور شاغا۔ وزیراعظم عمران خان نا ساڑی آ دورہ چین ءِ شونداری نا رداٹ اہم گوندا۔ اوپارے کہ کشت وکشار ، فارماسیوٹیکل، آٹوموٹو، ٹیکسٹائل و انفارمیشن ٹیکنالوجی ٹی پاکستانی طالب علم و پروفیشنلز آتیکن بھلو وارخواہی اس ساڑی ءِ۔ صدر مملکت ڈاکٹر عارف علوی پی ایچ ڈی ، ایم ایس، ایم فل، ماسٹرز، بیچلروایلو ڈگری دوئی کروک آ گریجویٹ آتیٹی ڈگری بشخا۔