پیپلزپارٹی نا لانگ مارچ اٹی سندھ انا سرکاری مشینری ءِ کاریم اٹ اتنگ انگ ءِ، غٹ محکمہ غاک سندھ حکومت تون ءُ تو 15 سال اٹی صوبہ نا ویل آک انت اکن ایسر متوس، شاہ محمو دقریشی

جیکب آباد۔ 28 فروری (اے پی پی) وزیرخارجہ شاہ محمود قریشی پارینے کہ پیپلزپارٹی نا لانگ مارچ اٹی سندھ حکومت نا سرکاری مشینری ءِ کاریم اٹ اتنگ انگ ءِ، سندھ پولیس و فائر برگیڈنا گاڈی تیٹی پیپلزپارٹی نا بیرک ءِ بشخنگ انگ ءِ، اسہ کنڈآ سندھ حق مارچ ءِ و ایلو کنڈآ سندھ حکومت نا سرکاری مارچ ءِ ہراٹی سرکاری وسیلہ غاتے کاریم اٹ اتنگا، دا السی حق آ ڈاکہ اس اف تو انت اسے، غٹ محکمہ غاک سندھ حکومت تون ءُ تو پیپلزپارٹی 15 سال اٹی صوبہ نا ویل آک انت اکن ایسر متوس۔ جیکب آباد اٹی میڈیا تون گپ وتران کرسا وزیرخارجہ شاہ محمود قریشی نا پاننگ ئس کہ وزیراعظم عمران خان ءِ قوم انا تکلیف آتااحساس ارے سندھ انا الس ءِ پیپلزپارٹی آن نجات ترفنہ۔ وزیراعظم عمران خان ملک ءِ پلوک آ مافیاتا مقابلہ ءِ کننگ کن پیش تمانے، ہراوڑ وزیراعظم عمران خان خیبرپختونخوا غان الس دشمن جماعت آتے چٹفسا پیش تماسس ولدا پنجاب آ بس، گلگت بلتستان و آزاد کشمیر آ ہنا، داسہ سندھ اٹی ہم وزیراعظم عمران خان بننگ والا ءِ۔ اوپارے کہ  ای سندھ انا مخلوق نا منت واری ءِ ہرفیوہ ہرا سندھ حق مارچ انا جاگہ غا کنے بخیر کننگ ءُ، اسہ سوج اسے نا ورندی ٹی او پارے کہ اگہ لاڑکانہ نا انتظامیہ ٹی زرس ہم سوجھ بوجھ ارے تو او تحریک انصاف نا قافلہ ءِ توپسہ انتئے کہ نن پنجاب اٹی پیپلزپارٹی نا کسر ءِ توپننگ نا فیصلہ کرینن۔ اگہ بلاول پنجاب و اسلام آباد آ ہِننگ کیک تو نن سندھ و لاڑکانہ غا انت اکن ہِننگ کپنہ، اگہ اڑاند اس شاغنگا تو اودے پرغنہ، ای سندھ انا مخلوق آن اَریفیوہ کہ سندھ ءِ ہرا فنڈ 15 سال اٹی تننگا اوفتے دیر اس کُنگ، اوفتا حساب ءِ تو ہلنگ کن نن سندھ آ بسونن۔ سندھ اٹی جان جوڑی تعلیم، سفائی، واٹرسپلائی، میونسپل کارپوریشن تون اوار غٹ محکمہ غاک سندھ حکومت تون ءُ تو 15 سال اٹی سندھ اناویل آتے پیپلزپارٹی انت اکن ایسر کتو۔ اوپارے کہ ای چیلنج کیوہ کہ وزیراعظم عمران خان و زرداری مون پہ مون تولر، زرداری عمران خان آن 3 سال انا حساب ءِ خواہے، عمران خان 3 سال انا حساب ءِ ایتک و ولدا عمران خان ، زرداری آن 15 سال انا حساب ءِ خواہک ولدا قوم فیصلہ کے کہ ملک ءِ دیر اس پُلا۔ اواسہ سوج اسے نا ورندی ٹی پارے کہ یوکرین آن پاکستانی طالب علم آتے پدی اتنگ کن پولینڈ، ہنگری رومانیہ نا حکومت آتون رابطہ کرینن، یوکرین نا وزیر خارجہ تون ہم ہیت مسنے۔ انشاءاللہ پاکستانی تے بحفاظت پدی اتینہ۔ کراسنگ پوائنٹ اٹ ودکی مننگ اتون پاکستانیک پدی سرمریرہ ، گڑاس پاکستانی ہموڑے برام کرینو و اوہموڑے رہینگ انگ خوارہ ولے ہرکس کہ ہموکان بننگ خواہک اوفتے پدی اتینہ۔ شاہ محمود قریشی پارے کہ ای است جم اُٹ سندھ انا مخلوق ءِ خناٹ او پیپلزپارٹی آن نجات دوئی کننگ خوارہ، سندھ انا مخلوق پیپلزپارٹی آن 15 سال آتا حساب ءِ ہلنگ خواہک۔