اسلام آباد۔ 28 فروری (اے پی پی) پاکستان و انڈونیشیا نا تین پہ تینی واپار اٹی 2021اٹی کوویڈ۔ 19 نا جہانی دین آن پد ہم 56 درسد ودکی مسنے۔ انڈونیشیا نا سفارت خانہ نا اسہ رپورٹ اسے نا رداٹ تدوک آسال اٹی ہڑتوم آ ملک آتا تین پہ تینی واپار نا کچ 3.9 ارب ڈالر اسکان وداوخت اس کہ 2020اٹی پاکستان و انڈونیشیا نا ہڑتوم آ کنڈآتا واپار نا کچ 2.5 ارب ڈالر ئسک ۔ ہندا وڑ 2020نا مقابلہ ٹی تدوک آ سال اٹی پاکستان و انڈونیشیا نا تین پہ تینی واپار نا کچ اٹی 56 درسد سالانہ یعنی 1.4 ارب ڈالر نانمان ودکی ریکارڈ کننگانے۔ یات سلے کہ داکان مست 2018 ٹی ہڑتوم آ ملک آتا تین پہ تینی واپار 3.1 ارب ڈالر ریکارڈ کننگاسس۔ رپورٹ نا رداٹ پاکستان و انڈونیشیا نا واپاری سفارتکاری نا گام گیج آتا رداٹ جوڑ کروک آ ویب پورٹل نا کمک اٹ ہڑتوم آ کنڈآتا واپار نا مون آ دننگ اٹ کمک ملنگ ءِ و 2021اٹی ویب پورٹل نا کمک اٹ 123 انڈنیشی کمپنی وخت اس کہ 115 پاکستان کمپنیک چندی معلومداری تے دوئی کریر ہرانا نتیجہ ٹی ہڑتوم آ ملک آتا نجی کمپنی تا براہ راست واپار نا کچ اٹی 9.84 ملین ڈالر ودکی مسنے۔
