مچ آ ملک انا سرکاری یونیورسٹی تیٹی اسہ سد ءُ سی ءُ ہفت گرین یوتھ کلب جوڑ کننگانے، ہرافتا رداٹ گرین الیکشنز اہم ءُ گام اس مریک، وزیراعظم نا خصوصی کمکار امور نوجوانان عثمان ڈار

اسلام آباد۔ 24 فروری (اے پی پی) وزیراعظم نا خصوصی کمکار امور نوجوانان عثمان ڈار پارینے کہ مچ آ ملک انا سرکاری یونیورسٹی تیٹی اسہ سد ءُ سی ءُ ہفت گرین یوتھ کلب جوڑ کننگانے۔ گرین یوتھ کلب نا رداٹ گرین الیکشنز اہم ءُ گام اس مریک۔ داخیال آتا درشانی ءِ او وزارت موسمیاتی بدلی و وزیراعظم نا یوتھ افیئرز ونگ انا نیام اٹ مروک آ اسہ اوڑدہی اسے ٹی کرے۔ وزیراعظم نا خصوصی کمکار امور نوجوانان عثمان ڈار پارے کہ دا گرین یوتھ کلب ورناتا مثبت و جان جوڑ سرجز آتیٹی شمولیت اٹ اہم ءُ کڑ د اس ادا کیک، دا گرین یوتھ کلب پاکستان نا ورناتے انٹرپرینیور شپ و کاروبار اٹی تینا کروک آ پائیدار شونداری نا وڑوڈول نا بارواٹ تربیت نا وارخواہی فراوان کیک۔ داڑآن مچ آ ملک اٹی پائیدار کاروبار نا چرجوئی بناکیک۔ سرسہب ورناپروگرام نا رداٹ گرین یوتھ انیشی ٹیٹیو بوٹ کیمپس نا اڈتننگ گرین یوتھ کلب آتا کمک اٹ کننگک دا بوٹ کیمپ آتیٹی گچین مروک ورناتے تربیت تننگک۔ گچین مروک ورناتے مالی آسودہی ہم فراوان کننگک۔ گرین یوتھ کلب گرین الیکشن ہم کرفک۔ اوپارے کہ ملک انا جامعہ غاتے تینا حق انا بابت سیاسی شعور نا گرج ءِ، گرین الیکشن دا چرجوئی ٹی اہم ءُ مزل نا نشان اس مریک۔ اوڑدہی ٹی داہیت آ امنا کننگاکہ ہر تُو مارچ انا تُو اٹی سرسہب ورنا نا گرین یوتھ گام انا رداٹ ’’گرین یوتھ ڈے‘‘ اڈتننگک۔ گرین یوتھ ڈے ورناتیٹی جو ش و شعور کننگ کن اڈتننگک۔ گرین یوتھ دے آ پاکستان نا ورناتیٹی نیال ہم بشخنگک۔ دیوان اٹی وزیراعظم نا سلاہکار موسمیاتی بدلی ملک امین ءِ سرسہب ورنا نا گرین یوتھ گام گیج آتا بارواٹ حوال تننگا۔ اوسرسہب ورنا پروگرام نا کنڈآن موسمیاتی بدلی نا بابت ویل آتیا ورناتے اوار کننگ و روشنا س کرفنگ نا کوشست آتا ستاءِ کرے۔